Հանրային հեռարձակողի խորհրդի նախագահ է ընտրվել Վասակ Դարբինյանը. Լուսանկար

Հանրային հեռարձակողի խորհրդի նախագահ է ընտրվել նույն խորհրդի անդամ Վասակ Դարբինյանը:

Այս մասին հայտնեցին Հանրային հեռարձակողի խորհրդից։

Նա ընտրվել է խորհրդի անդամների քվեարկությամբ։

Նախկին նախագահ Արա Շիրինյանի ժամկետը լրացել էր դեռևս ապրիլին, ինչից հետո հայտարարվել էր մրցույթ:

Խորհուրդը բաղկացած է ութ անդամից: Խորհրդի անդամներն են Արփի Ոսկանյանը, Արամ Սուքիասյանը, Վարուժան Օլքինյանը, Իրինա Շախնազարյանը, Արա Շիրինյանը և Քրիստինե Մելքոնյանը։

Վասակ Դարբինյանը ծնվել է 1959 թ․ հուլիսի 18-ին Շամշադինում։

Ավարտել է Երևանի պետական համալսարանի բանասիրական ֆակուլտետը։

1982-1985թթ. աշխատել է «Երևանի համալսարան» շաբաթաթերթում որպես լրագրող,

1985-1994թթ. եղել է Հայաստանի Գրողների միության գեղարվեստական գրականության պրոպագանդայի բյուրոյի փոխտնօրեն,

1990-1993թթ. աշխատել է «Հայք» շաբաթաթերթում որպես լրատվության բաժնի պատասխանատու, այնուհետև՝ որպես գլխավոր խմբագրի տեղակալ և պաշտոնակատար,

1994-1995թթ. եղել է «02» շաբաթաթերթի, 1996թ.՝ «Թերթ» շաբաթաթերթի գլխավոր խմբագիրը,

1996-1998թթ. աշխատել է որպես «Առավոտ» օրաթերթի խմբագիր, 1998-1999թթ.՝ Հանրային հեռուստաընկերության «Հայլուր» ծրագրի խմբագիր, 1999-2000թթ.՝ Արմենիա TV հեռուստաընկերության, «Օրվա մամուլը» հաղորդաշարի հեղինակ և խմբագիր,

2000-2002թթ․՝ Ա1+ հեռուստաընկերություն «Ա1+ մամուլ» հաղորդաշարի hեղինակ և խմբագիր, 2001-2010թթ.՝ «Տարեգիր» էլեկտրոնային թերթ, շաբաթաթերթ, օրաթերթ, հիմնադիր և գլխավոր խմբագիր, 2002-2003թթ.՝ «Այբ-Ֆե» օրաթերթ, գլխավոր խմբագիր, 2004թ.՝ «Աֆիշա» հանդեսի հայկական տարբերակի («ժամանց») խմբագիր,

2006-2008թթ. եղել է «Հայք» օրաթերթի գլխավոր խմբագիրը, 2011-2012թթ.՝ «Ժամանակ» օրաթերթի խմբագիրը, 2011-2014թթ.՝ «Արգելված գոտի» ամսագրի գլխավոր խմբագիրը,

2014-2015թթ. աշխատել է «Խոսքի ազատության պաշտպանության կոմիտե»-ում որպես մամուլի փորձագետ, 2016թ.՝ «Հայաստան-24» կայքի «Տեսադաշտ» հաղորդաշարի հեղինակ և վարող,

2010-2011թթ. և 2016-2021թթ. աշխատել է «Հայկական ժամանակ» օրաթերթում որպես սրբագրիչ:

2021 թ. հոկտեմբերի 15-ին ՀՀ վարչապետի N1165-Ա որոշմամբ՝ նշանակվել է Հանրային հեռարձակողի խորհրդի անդամ։