Աբխազիայում ՌԴ դեսպանատան կայքը ծանուցել է, որ այսուհետև չճանաչված հանրապետության բնակիչները Ռուսաստանի քաղաքացու ներքին անձնագիր կարող են ստանալ միայն ՌԴ տարածքում:
Ընդսմին, սահմանվել է, որ նրանցից յուրաքանչյուրը պետք է Ռուսաստանի բյուջեին 4-6 հազար ռուբլի պետտուրք վճարի: Աբխազիան պաշտոնապես ունի 243 հազար բնակիչ, որից 190 հազարն ստացել է ՌԴ քաղաքացու անձնագիր, բայց ձևակերպումներն արվել են տեղում՝ Սուխումիում գործող՝ Ռուսաստանի ՆԳՆ Միգրացիոն ծառայության կենտրոնի միջոցով:
Ինչպես տեղեկացել է «Նեզավիսիմայա գազետան», Աբխազիայում Ռուսաստանի դեսպանությունը կայացված որոշումը հիմնավորել է Աբխազիայի «մի շարք խորհրդարանականների դիրքորոշման պատճառով»:
Բանն այն է, որ փետրվարի 4-ին Աբխազիայի խորհրդարանի պաշտպանության և ազգային անվտանգության հարցերի հանձնաժողովը փակ նիստ է անցկացրել, որի ընթացքում պատգամավոր Ղվարչիան Սուխումիում ՌԴ ՆԳՆ Միգրացիոն ծառայության կենտրոնի գործունեությունը գնահատել է «ապօրինի» և «ինքնիշխան երկրի ներքին գործերին կոպիտ միջամտություն»:
Ղվարչիան տեղական հեռուստատեսության եթերում մեղադրել է որոշ գործընկերների, որ դռնփակ քննարկումներում «կատարել են երկոտանի «ժուչոկի» դեր»:
Միամտություն կլինի հավատալ, որ չճանաչված հանրապետության խորհրդարանի մի պատգամավորի հայտարարությունը պատճառ է հանիդսացել, որպեսզի Ռուսաստանի բարձրագույն իշխանությունը նման որոշում կայացնի: Նույն կերպ կարելի է ասել, որ ՌԴ ՆԳՆ Միգրացիոն ծառայության Սուխումիի կենտրոնը հազիվ թե աբխազ պատգամավորին հուզեր, եթե զբաղվեր միայն ՌԴ ներքին անձնագիր տրամադրելու հարցով:
Աբխազիան արդեն երեսունհինգ տարի է, գոյատևում է Ռուսաստանի բյուջեից տրվող լրավճարների հաշվին, փաստացի հանդիսանում է ՌԴ Կրասնոդարի երկրամասի վարչական և օպերատիվ կառավարման տարածք: Անձնագրերի հարցում ստեղծված իրավիճակն, ամենայն հավանականությամբ, կապված է «հատուկ ռազմական գործողությանը» Աբխազիայի մասնակցության հետ:
Բազմաթիվ աղբյուրներ վկայել են, որ Ռուսաստանի տարածքում միգրանտներին «պարզեցված կարգով քաղաքացիություն է շնորհվում, եթե դիմողը միաժամանակ պաշտպանության նախարարության հետ պայմանագիր է ստորագրում»:
Ըստ երևույթին, ՌԴ ՆԳՆ Միգրացիոն ծառայության Սուխումիի կենտրոնըփորձել է այդ պրակտիկան կիրառել նաեւ աբխազ երիտասարդ տղամարդկանց հանդեպ, ինչն էլ պատգամավոր Ղվարչիան որակել է «ինքնիշխան պետության ներքին գործերին կոպիտ միջամտության»:
Այսուհետև Աբխազիայի բնակիչները ՌԴ անձնագիր ստանալու համար հարկադրված կլինեն մեկնել Սոչի, պետտուրք մուծել և ժամերով հերթ կանգնել: «Աբխազները վաղեմի խոսք ունեն՝ մինչև կրակելը փորձիր մարդու հետ խոսել»,- ստեղծված իրավիճակն այսպես է բնութագրել չճանաչված երկրի նախագահի խորհրդական Շամբան:
Մոսկվան Սուխումիի հետ կխոսի՞, թե՞ «կկրակի»:
Բաց մի թողեք
«Ալիևի հարաբերությունները սրված են Պետական անվտանգության ծառայության տնօրեն Նաղիևի հետ»
Ռուսաստանի «մեկուսացվածության» ցայտուն վկայություններն ավելանում են
Ալիևը՝ Ռուսաստանին ռազմական պատասխան հարված հասցնելու մասին