Ինչ են քննարկել Մակրոնն ու Ալիևը․ Իրանի շուրջ իրավիճակը մարտահրավեր է նաև Ֆրանսիային

Կայացել է Ֆրանսիայի և Ադրբեջանի նախագահների հեռախոսազրույցը:

Այդ մասին հայտնել է Ադրբեջանի նախագահի պաշտոնական կայքը: Ինչպես հասկացվում է տեղեկատվությունից, հեռախոսազրույցի նախաձեռնություն ցուցաբերել է ֆրանսիական կողմը:

Ըստ հաղորդագրություն, Էմանուել Մակրոնը Ադրբեջանին հայտնել է Ֆրանսիայի համերաշխությունը և «աջակցությունը՝ կապվա Իրանի կողմից օդային հարձակման հետ»:

Մակրոնը նաև Ադրբեջանին «Իրանից Ֆրանսիայի քաղաքացիներին իր տարածքով տարհանելու պայմաններ ստեղծելու համար շնորհակալություն է հայտնել»: Իր հերթին Իլհամ Ալիևը Ֆրանսիայի նախագահին «հեռախոսազանգի և ցուցաբերած համերաշխության համար երախտագիտություն է հայտնել»:

Պաշտոնական հաղորդագրությունը նաև տեղեկացրել է, որ Մակրոնը և Ալիևը «Հարավային Կովկասում խաղաղության ամրապնդման և ադրբեջանա-ֆրանսիական երկկողմ հարաբերությունների վերականգման շուրջ մտքեր են փոխանակել, քննարկվել են համագործակցության հեռանկարի հետ կապված հարցեր»:

Ադրբեջանի և Ֆրանսիայի հարաբերությունները վերջին մի քանի տարիներին չափազանց բարդ և լարված են: Բաքվում «լրտեսության» և Ադրբեջանի պետական գույքը «դիտավորյալ փչացնելու» մեղադրանքով ազատարկման են ենթարկվել և պատիժ են կրում Ֆրանսիայի երկու քաղաքացիներ:

Անցյալ տարի Ադրբեջանի կառավարության հովանավորությամբ Բաքվում գումարվել է Նոր Կալեդոնիայի անկախության համար պայքարի առաջամարտիկների խորհրդաժողով: Այդ միջոցառման մասնակիցներին հղած ուղերձում Իլհամ Ալիևը Ֆրանսիան անվանել է «նորգաղութատիրական» երկիր:

Ալիևին Ֆրանսիայի նախագահ Մակրոնի հեռախոսազանգը վկայում է, որ երկու երկրների միջև «սառույցը հալվում» է, և դրան նպաստել է վերջերս կայացած Մակրոն-Ալիև հանդիպումը: Հեռախոսազրույցի մասին պաշտոնական տեղեկատվությունից հասկացվում է, որ քննարկվել է Հայաստանի և Ադրբեջանի միջև խաղաղության գործընթացը:

Ինչպես հայտնի է, Ֆրանսիայի նախագահը մայիսին կժամանի Երևան և նաև կմասնակցի Եվրոպական հանրության խորհրդաժողովին:

Ավելի վաղ ադրբեջանական կողմը հայտնել է, որ Ալիևը «ժամանակացույցի խտության պատճառով այդ օրերին օտարերկրյա ուղեւորություն չի նախատեսում»: Կարելի է, թերևս, ենթադրել, որ Ֆրանսիայի նախագահը «կարող է ծրագրել նաև այց Բաքու»:

Իրանի շուրջ իրավիճակը մարտահրավեր է նաև Ֆրանսիային:

Տեղեկություն է տարածվել, որ ֆրանսիական «Շառլ դը Գոլ» ավիակիրը մտել է Միջերկրական ծով: Չի բացառված, որ մի փուլում Ֆրանսիան միանա Իրանի դեմ իսրայելա-ամերիկյան հարվածներին:

Իրանի հասցեին Ադրբեջանի նախագահի չափազանց կոշտ հայտարարությունները ստեղծել են անկանխատեսելի իրավիճակ, որտեղ Ալիևին, անշուշտ, Ֆրանսիայի նախագահի աջակցությունը շատ թանկ է:

Բայց քաղաքականությունը շահերի փոխադրձություն է: Խնդիր է, թե Ֆրանսիայի նախագահի հարավկովկասյան «ցատկը» համադրվո՞ւմ է Հայաստան-Ադրբեջան «պատմական հաշտության» Դոնալդ Թրամփի ծրագրին: