Ո՞րն է կրտսեր Պրիմակովի պաշտոնանկության պատճառը, «Ռուսսկիյ դոմ»-ում նույնպես կադրային փոփոխություններ կարվեն

Ռուսաստանի նախագահ Վլադիմիր Պուտինի հրամանագրով Եվգենի Պրիմակովը ազատվել է «Ռոսսոտրուդնիչեստվո»-ի գործադիր տնօրենի պաշտոնից։ Նրա փոխարեն նշանակվել է Իգոր Չայկան, որ մինչ այդ զբաղեցնում էր գործադիր տնօրենի տեղակալի պաշտոնը։

Ուշագրավ է, որ Եվգենի Պրիմակովը խորհրդային-ռուսաստանյան հայտնի արեւելագետ, հետախույզ, դիվանագետ, պետական գործիչ Եվգենի Պրիմակովի թոռն է, Իգոր Չայկան՝ ՌԴ նախկին գլխավոր դատախազ Յուրի Չայկայի որդին։

Ո՞րն է կրտսեր Եվգենի Պրիմակովի պաշտոնանկության պատճառը, Կրեմլի պաշտոնական հաղորդագրությունը այդ մասին ոչինչ չի ասում։ Վերջին մեկ տարում «Ռոսսոտրուդնիչեստվո»-ի հետ կապված սկանդալային երկու դեպք է հայտնի։

Անցյալ հունիսին Բաքվում խուզարկություն է անցկացվել «Ռուսսկիյ դոմ» կոչված հաստատության գրասենյակում, ինչից հետո «Սպուտնիկ Ազերբայջան»-ի Բաքվի գրասենյակի տնօրենը և գլխավոր խմբագիրը ձերբակալվել, ապա կալանավորվել են։

Նրանք նախապես մեղադրվել են Ռուսաստանի հատուկ ծառայությունների գործակալ լինելու, ապա՝ ապօրինի ձեռնարկատիրությամբ զբաղվելու և ֆինանսա-տնտեսական խարդախության մեջ։ Ամիսներ անց նրանք նախ տնային կալանքի են փոխադրվել, ապա և ազատ արձակվել։ Այդուհանդերձ, Բաքվում «Ռուսսկիյ դոմի» գրասենյակը փակվել է և առայսօր չի գործում։

Երկրորդ և ավելի հնչեղ սկանդալը տեղի է ունեցել Բեյրութում։ Իսրայելական օդուժը ավերել է «Ռուսսկի դոմ»-ի գրասենյակը և հիմնավորել, որ «այն վաղուց քաղաքացիական օբյեկտ չէր, վերածվել էր «Հըզբալա»-ի զինապահեստի»։

Մոսկվան, իհարկե, այդ հիմնավորումը չի ընդունել, բայց և որևէ հակաքայլ չի ձեռնարկել, ինչից հասկացվում է, որ Իսրայելը իր քայլը հիմնավորող բավարար ապացույցներ ներկայացրել է։

«Ռոսոտրուդնիչեստվո»-ն ստեղծված է հետխորհրդային երկրների հետ Ռուսաստանի հարաբերություններում «փափուկ ուժի» կիրառման նպատակով։ Ուկրաինայի դեմ պատերազմից հետո իրավիճակ է փոխվել։

Երկու շաբաթ առաջ ՌԴ նախագահ Պուտինը Անվտանգության խորհրդի մշտական անդամների հետ քննարկել է ԱՊՀ անդամ երկրների հետ հարաբերությունների հարցը։ Զեկուցել է արտգործնախարար Լավրովը, ներկա են եղել երկու հատուկ ծառայությունների ղեկավարներ Բորտնիկովը և Նարիշկինը։

Կրտսեր Եվգենի Պրիմակովի պաշտոնանկությունը, ամենայն հավանականությամբ, որոշվել է այդ քննարկումների արդյունքով։ Ի՞նչ խնդիր է դրվել «Ռոսոտրուդնիչեստվո»-ի նոր գործադիր տնօրենի առջև, կարելի է միայն ենթադրել։

Ամենայն հավանականությամբ, «Ռուսսկիյ դոմ»-ի ներկայացուցչություններում նույնպես կադրային փոփոխություններ կարվեն, բայց Ռուսաստանի և հետխորհրդային երկրների հարաբերություններում դրանից հազիվ թե էական առաջընթաց լինի։

Ի՞նչ քայլեր կձեռնարկի Իգոր Չայկան, պարզ կլինի տեսանելի ապագայում, բայց բուն խնդիրը պայմանավորված չէ անձերով, այլ համակարգային է և առաջին հերթին պայմանավորված է նրանով, թե ի՞նչ է առաջարկում Ռուսաստանը։

Այն, ինչ ՌԴ իշխանությունների գաղափարախոսության և քաղաքակրթական արժեհամակարգի հիմքում է, իսկ դա արեւմտյան աշխարհի հետ սուր դիմակայությունն է, հետխորհրդային երկրների համար պահանջված չէ։