Անդրադառնալով Եվրոպական համայնքի երևանյան գագաթաժողովում Ուկրաինայի նախագահ Զելենսկու ելույթին, ռուսաստանյան «Նեզավիսիմայա գազետա»-ն առանձնացրել է այս հատվածը․ «Մենք Հայաստանին և Ադրբեջանին կայուն, համապարփակ և երկարատև խաղաղություն ենք ցանկանում» և հավելել, որ Հայաստան այցից կարճ ժամանակ առաջ Զելենսկին «Ադրբեջանում հանդիպել է Ալիևին»։
Հեղինակը այնուհետև ընդգծել է, որ Ալիև-Զելենսկի բանակցությունները կայացել են «Ռուսաստանի հետ սահմանամերձ Գաբալայի շրջանում, Բաքուն և Կիևը քննարկել են զենքի համատեղ արտադրությունը»։
Զելենսկու հետ բանակցություններից երկու օր հետո Իլհամ Ալիևը դարձյալ Գաբալայում ընդունել է Չեխիայի վարչապետ Բաբիշին։ Կողմերը դարձյալ քննարկել են սպառազինությունների ոլորտում համագործակցության հետ կապված հարցեր։
Ադրբեջանական մամուլում տեղեկություն է հայտնվել, որ խոսքը ոչ թե զենքի և զինամթերքի արտադրության, այլ «զրահատեխնիկայի և հրետանային համակարգերի վերականգնման և արդիականացման ձեռնարկություն հիմնադրելու խոշոր նախագծի մասին է, որի իրականացման դեպքում այն կարող է սպասարկել նաև տարածաշրջանի երկրներին»։
Այս համատեքստում հայտնի է դարձել, որ Իտալիայի վարչապետ Մելոնին Երևանից ուղևորվել է Բաքու, որտեղ կայացել է Ադրբեջանի նախագահի հետ նրա փակ հանդիպումը։ Թեև ադրբեջանական մամուլը Մելոնիի այցը ներկայացնում է Ադրբեջանից Իտալիա առաքվող բնական գազի տարեկան ծավալները մեծացնելու շուրջ բանակցությունների կտրվածքով, ավելի հավանական է թվում, որ կողմերը քննարկում են Եվրոպայի անվտանգության ապահովմանը Ադրբեջանի հնարավոր ներգրավվածությունը։
Իտալիայի վարչապետը վերջերս բավական սուր բանավեճ է ունեցել ԱՄՆ նախագահ Դոնալդ Թրամփի հետ, երբ վերջինս խոսել է Իսպանիայից և Իտալիայից ամերիկյան զորքերը դուրս բերելու մասին։ Եվրամիությունը ձգտում է հասնել Եվրոպայի «անվտանգության ինքնիշխան համակարգի հաստատմանը»։
Այդ խնդրի լուծման գործում Բրյուսելը կարևորում է Թուրքիայի ռազմաարդյունաբերական համալիրի դերը։ Բացառված չէ, որ Եվրահանձնաժողովը և ՆԱՏՕ-ն այդ առումով գնահատում են նաև Ադրբեջանի հնարավորությունները։
Կարևոր է նկատել, որ Ֆրանսիայի նախագահ Մակրոնը Հայաստան պետական այցից հետո մտադիր է Ադրբեջանի նախագահի Ալիևի հետ քննարկում ունենալ։ Ֆրանսիան Եվրոպայի «անվտանգության ինքնիշխան համակարգի», թերևս, ամենաեռանդուն ջատագովն է։
Բաց մի թողեք
ԵՄ կողմից 20 միլիարդ եվրո արժողությամբ հսկայական արհեստական բանականության համակարգչային կենտրոններ կառուցելու ծրագիրը
Ավստրիան արտաքսում է Ռուսաստանի դեսպանատան երեք աշխատակիցների՝ Վիեննայում անտենաների լրտեսության կասկածանքով
Մելոնին Երևանում քննադատել է Թրամփին