Պահպանողական նախկին վարչապետը քաղաքական դաշտի «անտեսված, բայց ակնհայտ խնդիրն» է:
ԱԹԵՆՔ – Պահպանողական ազդեցիկ գործիչ Անտոնիս Սամարասի վերադարձը քաղաքականություն՝ նոր (դեռևս անանուն) կուսակցության միջոցով, կարող է զրկել վարչապետ Կիրիակոս Միցոտակիսին սպասվող ընտրություններում մեծամասնություն ապահովելու հնարավորությունից և վերակենդանացնել տասնամյակների վաղեմություն ունեցող ընտանեկան թշնամանքը։
Սամարասների և Միցոտակիսների տոհմերի միջև պատմությունը խոր արմատներ ունի. այն ձգվում է ավելի քան երեք տասնամյակ և ուղեկցվել է մրցակցությամբ ու դավաճանությամբ։
Անցյալ շաբաթավերջին Սալոնիկի միջազգային տոնավաճառում Սամարասը դարձել էր «սենյակում գտնվող մեծ փիղը» (այսինքն՝ այն ակնհայտ, բայց անհարմար թեման, որի մասին բոլորը գիտեն, սակայն խուսափում են բարձրաձայնել), ինչպես ձևակերպել էր իշխող պահպանողական «Նոր ժողովրդավարություն» կուսակցության պաշտոնյաներից մեկը։
«Սամարասը գիտի՝ ինչպես վնաս հասցնել կուսակցությանը», – ավելի ուշ խոստովանել է Միցոտակիսը։
Միցոտակիսը կարող է դժվարանալ միակուսակցական կառավարություն ձևավորել 2027 թվականի գարնանը կայանալիք ընտրություններից հետո, քանի որ ներկայումս ոչ մի քաղաքական ուժ չի ցանկանում համագործակցել նրա հետ։ Սամարասի գլխավորությամբ ստեղծվող նոր կուսակցությունը կարող է վերջին հարվածը հասցնել՝ խափանելով բացարձակ մեծամասնություն ստանալու ծրագրերը։
Դավաճա՞ն
1990-ականների սկզբին Սամարասը զբաղեցրել է արտաքին գործերի նախարարի պաշտոնը գործող վարչապետի հոր՝ Կոնստանտինոս Միցոտակիսի կառավարությունում։ Նա պաշտոնանկ է արվել՝ ավագ Միցոտակիսի հետ ունեցած տարաձայնությունների պատճառով, որոնք կապված էին Հյուսիսային Մակեդոնիայի անվան շուրջ ծագած վեճի հետ։
1993 թվականին նա Չնայած Միցոտակիսների ընտանիքի հետ ունեցած բարդ անցյալին՝ 2013 թվականին նա Կիրիակոս Միցոտակիսին նշանակեց վարչական բարեփոխումների նախարար՝ այդպիսով հիմք նախապատրաստելով նրա քաղաքական կարիերայի և, ի վերջո, վեց տարի անց վարչապետի պաշտոնը ստանձնելու համար։
Սամարասը հայտնի չէ իր քաղաքական նրբանկատությամբ։ Երբ 2015 թվականին նա ընտրություններում պարտվեց ձախակողմյան առաջնորդ Ալեքսիս Ցիպրասին, նա խախտեց արարողակարգը և չներկայացավ վարչապետի աշխատասենյակ՝ պաշտոնը փոխանցելու համար։
2024 թվականի նոյեմբերին մրցակցությունը նոր թափով բռնկվեց։ Միցոտակիսը հեռացրեց Սամարասին «Նոր ժողովրդավարություն» կուսակցությունից այն բանից հետո, երբ վերջինս քննադատեց կառավարությանը հարևան Թուրքիայի նկատմամբ չափազանց մեղմ քաղաքականություն վարելու համար։
Այդ պահից ի վեր «Պանդորայի արկղը» կրկին բացվեց։ «Կցանկանայի հուսալ, որ Սամարասը կմտածի իր թողած ժառանգության մասին», – ասաց Միցոտակիսը։
«Նա պետք է մտահոգվի սեփական ժառանգության մասին», – պատասխանեց Սամարասը՝ պնդելով, որ Միցոտակիսը կհիշվի որպես կոռուպցիայի վարչապետ։
Լիբերալներն ընդդեմ MAGA-ի
Սամարասը, ով կոշտ պահպանողական է (հատկապես արտաքին քաղաքականության հարցերում), մեղադրում է Միցոտակիսին իր լիբերալ քաղաքականության միջոցով կուսակցության «ԴՆԹ-ն» փոխելու մեջ։ Նա նաև քննադատել է Միցոտակիսին՝ կառավարության կազմում սոցիալիստական PASOK-ի մի շարք տեխնոկրատների ներգրավելու համար, ինչի արդյունքում փաստացի հետին պլան են մղվել կենտրոնամետ-աջ ավանդական քաղաքական գործիչները։
«Նոր ժողովրդավարության» բազմաթիվ անդամներ Սալոնիկում Euractiv-ին հայտնել են, որ Սամարասի գլխավորած կուսակցությունը վնաս կհասցնի։ Այնուամենայնիվ, նրանցից ոմանք խուսափել են ուղղակիորեն քննադատել նրան։
«Կուսակցության հիմնական զանգվածն այս քայլը դավաճանություն չի համարում, և դա բարդացնում է իրավիճակը», – ասել է «Նոր ժողովրդավարության» ավագ պատգամավորներից մեկը։
Երբ պատգամավորին հարցրին այն մասին, որ Սամարասն ինքը նախկինում համագործակցել է PASOK-ի հետ, նա պատասխանեց. «Դա երկու կուսակցական առաջնորդների միջև կնքված համաձայնագիր էր՝ երկրի համար դժվարին ժամանակաշրջանում։ Խոսքը չէր վերաբերում այնպիսի դեպքի, երբ մարդիկ հանկարծակի լքում են PASOK-ը և դառնում որոշում կայացնողներ՝ սահմանելով կենտրոնամետ-աջ ուղղությունը»։
Սամարասը կապ է հաստատել նախկին վարչապետ Կոստաս Կարամանլիսի մերձավոր թեկնածուների հետ. վերջինս «Նոր ժողովրդավարություն» կուսակցության քաղաքական դինաստիայի մեկ այլ ներկայացուցիչ է, ով լռություն է պահպանում ընթացիկ հակամարտության վերաբերյալ։
Վերջերս Սամարասը հանդիպել է նաև ԱՄՆ դեսպան Քիմբերլի Գիլֆոյլի հետ, ով կապված է Դոնալդ Թրամփի MAGA շարժման հետ։
Պատգամավորի կարծիքով՝ Սամարասը չի բացառի ընտրություններից հետո «Նոր ժողովրդավարության» հետ հնարավոր համագործակցության հավանականությունը՝ պայմանով, որ Միցոտակիսն այլևս վարչապետ չի լինի։
Բաց մի թողեք
Ֆոն դեր Լեյենը քննադատության է ենթարկվել տիեզերական մեգա գործարքին աջակցելուց հետո
Ֆոն դեր Լեյենը պաշտպանում է տիեզերական ոլորտի խոշոր գործարքը՝ չնայած ԵՄ-ի կողմից սպասվող հակամենաշնորհային հետաքննությանը
Բոլորը ցանկանում են, որ իրենց թեման տեղ գտնի «Եվրոպական միության վիճակի մասին» ելույթում