Մոսկվան ողջունում է Ալմաթիի հանդիպումը, շփումներն Ալմաթիում ընթանում են ՌԴ, Հայաստանի եւ Ադրբեջանի ղեկավարների եռակողմ պայմանավորվածությունների հունով, մայիսի 15-ին հայտարարել է ՌԴ արտգործնախարարության խոսնակ Մարիա Զախարովան:
Այս հայտարարությունը բավականին ուշագրավ է, հատկապես այն ֆոնին, որ Ալմաթիի արտգործնախարարական հանդիպման հանգամանքը ողջունել է նաեւ Ֆրանսիայի արտգործնախարարությունը՝ երկու օր առաջ տարածած հայտարարությամբ: Ստացվում է, որ Փարիզը եւ՞ս ողջունում է եռակողմ հայտարարության հունով ընթացող բանակցությունը:
Հազիվ թե խոսք լիներ պարզապես հերթապահ ողջույնի մասին, առանց բովանդակությանը տիրապետելու: Այդպիսի ողջույնները չեն արվում հերթապահության կամ քաղաքավարության սկզբունքով: Մյուս կողմից, Ռուսաստանի ԱԳՆ խոսնակին ո՞վ է հայտնել, թե ինչ հունով են ընթացել Ալմաթիի բանակցություններ: Ղազախական կո՞ղմն է Մոսկվային հայտնել դա, Ադրբեջա՞նը, թե՞ Հայաստանը: Ալմաթիից հետո հայտնի չէ հայ-ռոսական այդ մակարդակի որեւէ շփման մասին:
Միեւնույն ժամանակ, կարծես թե բավականին նկատելի հակասություն կա Զախարովայի, եւ այդ գերատեսչության ղեկավար կազմի ներկայացուցիչ՝ փոխնախարար Գալուզինի հայտարարությունների միջեւ: Գալուզինը իր հարցազրույցում նշել է, որ Երեւանն Արեւմուտքի ճնշման տակ սառեցրել է փոխվարչապետների մակարդակով եռակողմ աշխատանքային խմբում իր գործունեությունը:
Խոսքը Օվերչուկ, Գրիգորյան, Մուստաֆաեւ եռյակի գլխավորությամբ աշխատանքային խմբի մասին է, որ ստեղծվել է 2021 թվականի հունվարի 11-ի Մոսկվայի եռակողմ համաձայնությամբ եւ զբաղվում է հաղորդուղիների ապաշրջափակման հարցերով:
Տարօրինակ չէ՝ Երեւանը եռակողմ աշխատանքային խմբի գործունեության մասով սառեցնում է իրավիճակի, իսկ Ալմաթիում մասնակցում եռակողմ հունով բանակցության: Թե՞ Ալմաթիի բանակցությունը այլ բանի մասին է, ոչ հաղորդուղիների ապաշրջափակման:
Համենայն դեպս այդ ֆոնին էլ ուշադրության է արժանի Ալմաթիի հանդիպման բացման խոսքում Հայաստանի արտգործնախարար Միրզոյանի շեշտադրումը, թե կառուցողական տրամադրված Երեւանը կողմ է ոչ միայն Խաղաղության պայմանագիր ստորագրելուն, այլ նաեւ ավելի առաջ գնալուն եւ հաղորդուղիները ապաշրջափակելուն: Ստացվում է, որ Խաղաղության պայմանագիրն ինքնին ուղիիղ առնչություն չունի հաղորդուղիների թեմայի հետ: Այդ դեպքում ի՞նչն է մնում Ալմաթիի «տակը»: Այն ողջունող Մոսկվան ու Փարիզը գիտե՞ն:
Բաց մի թողեք
Ալիևի անհավատալի արկածներն Իտալիայում՝ ոչ միայն որպես Ադրբեջանի նախագահ, այլև՝ ՌԴ նախագահի «լիազոր ներկայացուցիչ»
Մոսկվան Ադրբեջանի եւ Թուրքիայի հետ որեւէ «ոչ պակաս ընդգրկուն» պայմանավորվածությամբ չի հարվածի «թիկունքից»
«Դիմադրության» շարժման «սրբազան» շարունակությունը․ առաջիկա հավաքին իրական շահառուները դուրս կգա՞ն «փարդի հետևից»