«Փոխհրաձգություններ» Բագրատ Սրբազանի ու Սուրեն Պետրոսյանի միջև

Բագրատ Սրբազանը «վերջին անգամ զգուշացրել է» Սուրեն Պետրոսյանին, որ եթե վերջինս ասելիք ունի, թող գնա ու ասի։

«Սուրեն Պետրոսյանն ո՞վ է։ Եթե Սուրեն Պետրոսյանն ասելիք ունի, կգա ու կասի: Վերջին անգամ զգուշացնում եմ, ուղղակի, ձեր միջոցով, եթե ասելիք ունի՝ ուրեմն կգա ու կասի»,- լրագրողներին ասել է Գալստանյանը՝ ի պատասխան Սուրեն Պետրոսյանի վերջին հայտարարությունների մասին հարցի:

Դիտարկմանը, թե Պետրոսյանը իր մասին դրական է արտահայտվել, Գալստանյանը պատասխանել է, թե ինքն էլ է դրական արտահայտվում։

Սուրեն Պետրոսյանը խոսել է Գալստանյանի շարժման ժամանակ իր անձի շուրջ բարձրացած աղմուկի մասին՝ հերքելով խոսակցությունները, թե ներդրված է եղել շարժման մեջ:

«Եթե մայիսի 9-ին շարժման պիկն էր, այդ օրը որտե՞ղ երևաց իմ ներդրված լինելը։ Այս ամենը եղավ վերջացավ, հունիսի 12-ին ես դարձա ներդրվա՞ծ»,- ասել է նա:

Պետրոսյանը նշել է՝ մինչ շարժման սկսելը Ոսկեպարի բնակիչներն իրեն ասել են, որ Գալստանյանի՝ գյուղ գալուց հետո պետք է նրա հետևից փակել ճանապարհը, քանի որ գալու են դաշնակցականները, Քոչարյանի, Սարգսյանի կողմնակիցները. «Ես խոսք տվեցի, որ չի լինի ընդդիմության հերթական պայքար, սակայն վերջում եղավ «Դիմադրություն-2» շարժում։ Ստացվում է, որ ես գյուղացիներին խաբեցի»։

Նա անդրադարձել է Գառնիկ Դանիելյանի հետ հարաբերություններին՝ նշելով, որ նրա հայտարարությունները անհիմն են ու սուտ. «Ինքն ասում է, թե Պետրոսյանը եկել է Փաշինյանի օրակարգով, սակայն իրենց պատգամավորը գնաց գյուղ ու ասաց՝ Փաշինյանը ճիշտ է։ Այդ դեպքի հետ կապված ոչ մի աղմուկ չբարձրացավ»։

Պետրոսյանը հայտարարել է նաև, որ շարժման ակտիվ փուլում ինքն է իր ծանոթի միջոցով կապ հաստատել Իշխան Զաքարյանի հետ, որի արդյունքում Գալստանյանը հանդիպել է Զաքարյանին. «Սրբազանը Զաքարյանի վերաբերյալ բեմից ինչ ասել է, դա տեղի է ունեցել հանդիպման ժամանակ։ Զաքարյանն ասել է, որ պատրաստ է ստորագրել, դրանից ավել ես ոչինչ չգիտեմ»։

Ըստ Պետրոսյանի՝ «քոչարյանականների, սերժականների» չգալու դեպքում շարժումը հաջողություն էր ունենալու։ Վերջում Պետրոսյանը կրկին հայտարարել է, որ Գառնիկ Դանիելյանն ինչ խոսում է, սուտ է խոսում։