Հակոբ Ասլանյանը հեռացվել է «Քաղաքացիական պայմանագիր» խմբակցությունից

Աժ «Քաղաքացիական պայմանագիր» խմբակցության պատգամավոր Հակոբ Ասլանյանը հեռացվել է խմբակցությունից:

Այս մասին լրատվամիջոցների հետ զրույցում հայտնեց խմբակցության քարտուղար Արթուր Հովհաննիսյանը:

«Պարոն Ասլանյանը կուսակցության և խմբակցության կարգերը խախտել է և հեռացվեց, քանի որ հայտնի հանգամանքներով պայմանավորված կար պարոն Աղազարյանը, ով արտահոսքեր էր կազմակերպում և դա ապացուցված է, իսկ ցանկացած մեկը, ով կպաշտպանի Աղազարյանին, պետք է արժանանար էս ճակատագրին: Նա այլևս չի հանդիսանում ՔՊ խմբակցության անդամ: Մանդատի հարց քննարկել ենք, բայց պարոն Ասլանյանը, որքան նկատել եմ, չի ցանկանում այն վայր դնել»,- ասաց Հովհաննիսյանը։

Ըստ նրա, Հակոբ Ասլանյանին գործընկերային մթնոլորտում հնարավորություն է տրվել բացատել իր գործողությունների տրամաբանությունը, ինչը Ասլանյանը չի կարողացել հիմնավորել:

Վահագն Ալեքսանյանն էլ նշեց, որ Հակոբ Ասլանյանը հեռացվեց «Քաղաքացիական պայմանագիր» խմբակցությունից՝ կուսակցական կարգապահությունը խախտելու համար:

Ինչպես ավելի վաղ հայտնել էինք, ՀՀ ԱԺ «Քաղաքացիական պայմանագիր» խմբակցության պատգամավոր Հակոբ Ասլանյանը հայտարարել էր, որ որոշում է կայացրել մեկ ամսով կասեցնել ՔՊ-ում իր գործունեությունը։

ՔՊ վարչության անդամ Արսեն Թորոսյանն էլ, հակադարձելով այդ հայտարարությունը, տեղեկացրել էր, որ Հակոբ Ասլանյանը կհեռացվի ՀՀ ԱԺ «Քաղաքացիական պայմանագիր» խմբակցությունից:

Ավելի ուշ Ասլանյանը սոցցանցի իր էջում մի քանի սքրինշոթ էր հրապարակել, որով հայտնել էր, թե իր հայտարարությունը հիմնված է եղել սխալ տեղեկությունների վրա և շարունակում է մնալ «Քաղաքացիական պայմանագիր» կուսակցության և խմբակցության անդամ: Այդ սքրինշոթերից մեկը, որը Ասլանյանը հետագայում հեռացրել է, վերաբերել է իր և ԲՏԱ նախարար Մխիթար Հայրապետյանի նամակագրությանը:

Այս նամակագրության վերաբերյալ էլ պարզաբանում էր տարածել ԲՏԱ նախարարի խոսնակը:

Հակոբ Ասլանյանը հեռացվել է կուսակցական կարգապահությունը խախտելու համար: Այս մասին լրագրողների հետ ճեպազրույցում նշեց ԱԺ ՔՊ խմբակցության պատգամավոր Վահագն Ալեքսանյանը:

Հարցին, թե մասնավորապես ինչի համար, Ալեքսանյանը հիշեցրեց. «Մասնավորապես Հովիկ Աղազարյանի, ձեր մշտական ինֆորմացիայի հոսքի աղբյուրի. «Չի կարելի լինել ԱԺ պատգամավոր ու իջնել այն մակարդակին և դառնալ նողկալի խոսափող, կամ արտահոսքի չփակված անցք: Պատգամավորի կարգավիճակը չի կարելի իջեցնել այդ մակարդակի: Լինելով պատգամավոր` չի կարելի աշխատել մի լրատվականի հետ, որը պատկանում է հայտնի ուժերի ու դառնալ այդ լրատվականի ինֆորմատոր»: