ՊԵԿ-ը ձայնագրող և հետևող սարքեր է գնել

Պետական եկամուտների կոմիտեն մեկ անձից կատարվող գնման ընթացակարգով պայմանագիր է կնքել Աշոտ Դավթյան ԱՁ-ի հետ։

Ըստ պայմանագրի գնվել է 3 հատ յուրաքանչյուրը 52 հազար դրամ արժողությամբ ձայնագրող սարք, որը հնարավորություն ունի 8 մետր շառավիղով ավելի քան 100 ժամ անընդմեջ ձայնագրելու։

Եւս 3 ձայնագրող սարք էլ ձեռք է բերվել յուրաքանչյուրը 62 հազար դրամով։ Այս սարքերը 7 մետր շառավիղով անընդմեջ 240 ժամ ձայնագրելու հնարավորություն ունեն։

364 հազար դրամ էլ հատկացվել է 7 տեսախցիկ գնելու համար։ Տեսախցիկները մեկ լիցքավորումով աշխատում են 5-7 ժամ։

Այս պայմանագրով վերջին ապրանքի գնումը կապված է GPS սարքերի հետ։ Ձեռք է բերվել 6 սարք, ընդհանուր 288 հազար դրամ արժեքով։ Այս պայմանագրի համար ՊԵԿ-ը վճարելու է 944 հազար դրամ։

Պայմանագիրը կնքվել է դեկտեմբերի 25-ին։