Ի տարբերություն Վենեսուելայի նախագահ Նիկոլաս Մադուրոյի առևանգման հատուկ գործողության, Իրանի դեմ ռազմական գործողություններ սկսելու ծրագիրը Միացյալ Նահանգների նախագահի ոչ բոլոր խորհրդականներն են պաշտպանում:
Այս եզրակացության է եկել Reuters-ը՝ վկայակոչելով Սպիտակ տան իր աղբյուրներին: Ընդսմին, տարաձայնությունները «ավելի սուր են հանրապետական կուսակցության ազդեցիկ գործիչների մոտ»:
Կոնգրեսի երկու պալատներում հանրապետականներն ունեն մեծամասնություն, բայց նոյեմբերին կայանալիք միջանկյալ ընտրություններում կարող են դիրքեր կորցնել, քանի որ «հարցման արդյունքներով ամերիկացիների մեծամասնությունը կենտրոնացած է տնտեսական խնդիրների վրա»:
Իսրայելական «Եդիոտ ահրոնոտ» պարբերականը, վերլուծելով Իրանի դեմ ԱՄՆ կողմից ռազմական ուժի կիրառման հավանականությունը, առանձնացրել է հանրապետական կուսակցության «ներքին տեսաբան» Լորեն Քոուլիի տեսակետը, ըստ որի՝ «Մերձավոր Արևելքում մեծաքանակ ուժեր կենտրոնացնելով և մի քանի անգամ սպառնալով, որ գործարքի բացակայության դեպքում Իրանի համար շատ վատ կլինի, նախագահը (Դոնալդ Թրամփը) ինքն իրեն ծուղակ է մղել»:
Քոուելին գտնում է, որ Իրանին չհարվածելու դեպքում Թրամփը ««կկորցնի միջազգային հեղինակությունը», բայց եթե «ռազմական գործողությունները տևեն անգամ մի քանի շաբաթ, ապա նա խնդիրներ կունենա ամերիկյան ընտրողների հետ»:
Մամուլը չի փոխանցում, թե Թրամփի վարչակազմում ովքեր են Իրանի միջուկային ծրագրի շուրջ իրավիճակի խաղաղ կարգավորման կողմնակիցները, բայց կարելի է ենթադրել, որ Սպիտակ տան որոշումների վրա շատ մեծ է Իսրայելի կառավարության և ԱՄՆ հրեական լոբբիի ազդեցությունը:
Երուսաղեմում նույնիսկ չեն փորձում թաքցնել, որ Իրանի շուրջ ստեղծվել է իրավիճակ, որի «միակ հանգուցալուծումը կրոնապետության փլուզումն է, և պատմական պատեհությունը չի կարելի բաց թողնել»:
Մինչ Վաշինգտոնում «Իրանին հարվածե՞լ, թե՞ դիվանագիտությամբ հասնել գործարքի» հարցում չեն կողմնորոշվում կամ տեսք են ընդունում, թե «չեն կողմնորոշվել», Թեհրանը փետրվարի 21-ին «ծովային բազավորման հակաօդային պաշտպանության գերժամանակակից հակարագ են փորձարկել»:
Որևէ տեղեկություն առայժմ չկա՝ դա իրանակա՞ն արտադրության հրթիռ է, թե՞ այլ երկրից է ձեռք բերվել: Fars գործակալությունը հայտնել է, որ փորձարկումն իրականացվել է Հորմուզի նեղուցում: Ավելի վաղ Իրանը սպառնացել է փակել նեղուցը:
Իրանի խորհրդարանի ազգային անվտանգության և արտաքին կապերի հանձնաժողովի նախագահ Իբրահիմ Ազիզին այդ կապակցությամբ ասել է. «ԱՄՆ-ը գիտի, որ Իրանը պատերազմի չի պատրաստվում, բայց պատերազմ վարել կարող» է:
Իսրայելական ynet-ի մեկնաբանը իրանցի խորհրդարանականի այս խոսքից եզրակացրել է, որ Թեհրանը Վաշինգտոնին «գործարքի առաջարկություն է արել և սպասում է պատասխանի»:
Նախագահ Մասուդ Փեզեշքիանի գնահատմամբ՝ «Իրանը երբեք սպառնալիքի առջև գլուխ չի խոնարհի»: Իրանա-ամերիկյան լարվածությունն, այսպիսով, հասել է պատմական ամենաբարձր կետի:
ԱՄՆ-ը և Իսլամական հանրապետությունը երբեք ուղղակի առճակատմանն այսքան մոտ չեն եղել, բայց դա նաև դիվանագիտական հանգուցալուծման շատ ավելի առարկայական հնարավորություն է, քան Վաշինգտոնը և Թեհրանը անցած քառասունյոթ տարիներին երբևէ ունեցել են:
Բաց մի թողեք
Արցախյան շարժումը դուրս բերվեց սահմանադրականության հունից և ուղղորդվեց ազգամիջյան արյունալի հակամարտության հուն
«Ո՞վ է հանձնել Արցախը» սակրալ թվացող հարցն ու պատասխանը
Խամենեիին իշխանության տրանզիտ իրականացնելու համար տրված ժամկետ է. Նա կհեռանա