Ռուսաստանի Դաշնության Իվանովոյի մարզի «Ադրբեջանական մշակութային ինքնավարություն» կազմակերպության ղեկավար Ասիֆ Մամեդովը Վլադիմիր Պուտինի հրամանագրով զրկվել է ՌԴ քաղաքացիությունից:
Այդ մասին հայտնել են Բաքվի իշխանամետ լրատվամիջոցները: Նրանց տեղեկություններով, Մամեդովը «հանդիսանում է իշխող «Միասնական Ռուսաստան» կուսակցության անդամ» և մտադիր էր «առաջադրվել մարզային դումայի պատգամավոր»:
Ադրբեջանական լրատվամիջոցներին հայտնի է դարձել, որ «Միասնական Ռուսաստան» կուսակցության Իվանովոյի մարզային կառույցը «նախապես հավանություն է տվել Մամեդովի թեկնածությանը, բայց հետո հրաժարվել»:
Իր այդ քայլը ՌԴ իշխող կուսակցության Իվանովոյի մարզային կառույցը հիմնավորել է Մամեդովի թեկնածության դեմ «հանրային լուրջ դժգոհությամբ»:
Բաքվի իշխանական haqqin.az-ի փոխանցմամբ՝ մարզային դումայի ընտրություններին Մամեդովի մասնակցության և պատգամավոր ընտրվելու դեմ բուռն գործունեություն է ծավալել Սերգեյ Մարդանը և սպառնացել, որ եթե նրա թեկնածությունը չմերժվի, ապա «դաշնային իշխանության կողմից հարվածի տակ կհայտնվեն «Միասնական Ռուսաստանի» մարզային կառույցի ղեկավարները և նահանգապետը»:
Հայտնի է, որ Ասիֆ Մամեդովը Իվանովոյում ձեռնարկատիրությամբ զբաղվում է ավելի քան քառորդ դար և գլխավորում է նաև մարզկենտրոնի «ադրբեջանական համայնքը»: Խիստ ուշագրավ է, որ, ինչպես ադրբեջանական մամուլն է փոխանցել, նրան քաղաքացիությունից զրկելու համար Վլադիմիր Պուտինը հիմք է ընդունել Անվտանգության դաշնային ծառայության միջնորդությունը, որտեղ Մամեդովի գործունեությունը գնահատված է որպես «ՌԴ ազգային անվտանգության համար սպառնալիք»:
Հանրահայտ է, որ արտերկրում և առաջին հերթին՝ Ռուսաստանում «ադրբեջանական սփյուռքը» կազմավորվել է պաշտոնական Բաքվի նախաձեռնությամբ և անմիջական ուղղորդմամբ:
Մոսկվայում, Սանկտ Պետերբուրգում և Ռուսաստանի այլ քաղաքներում և մարզերում «ադրբեջանական համայնքի» ղեկավարները փաստացի Ադրբեջանի պետական ծառայողներ են և գործում են Իլհամ Ալիևի աշխատակազմից ստացած ցուցումների և հրահանգների հիման վրա:
Եթե ՌԴ ԱԴԾ-ն Իվանավոյի «ադրբեջանական համայնքի ղեկավարի» գործունեությունը գնահատել է որպես «ազգային անվտանգությանը սպառնալիք», ապա նշանակում է, որ Մոսկվան Ռուսաստանում «ադրբեջանական սփյուռքի» ղեկավար կառույցներին մեղադրում է ի վնաս ՌԴ շահերի գործելու մեջ:
Այս առումով ուշագրավ է, որ մեկ շաբաթ առաջ Ռուսաստանի փոխարտգործնախարար Գալուզինը պաշտոնական Բաքվին կոչ է արել ազատ արձակել անցյալ տարվա ամռանը Բաքվում «թմրանյութերի շրջանառության» մեղադրանքով կալանավորված ՌԴ մոտ երկու տասնյակ քաղաքացիների:
Ըստ երևույթին, Բաքվից դրական արձագանք չի ստացվել, և Մոսկվան հրապարակայնացրել է, որ Ռուսաստանի տարածքում գրանված ադրբեջանական «մշակութային ինքնավարությունները» փաստացի ՌԴ «անվտանգությանը սպառնալիք են»:
Սա շատ ծանրակշիռ և քաղաքական ախուսափելի հետեւանքներ ենթադրող մեղադրանք է: Հայտնի չէ, թե քաղաքացիությունից զրկված Մամեդովին ինչ ճակատագիր է սպասվում: Մեծ է հավանականությունը, որ եթե նա փախուստի չի դիմել, ապա կձերբակալվի:
Իսկ ի՞նչ է սպասվում «ադրբեջանական մշակութային ինքնավարություններին»:
Բաց մի թողեք
Թուրքիայի ու Ադրբեջանի հետ խաղաղություն պետք է, բայց պիտի մի բան հասկանալ
Պետությունների շահերը, նույնիսկ եթե նրանք վաղեմի բարեկամներ են, միշտ չէ որ համընկնում են
«Ռուսական երկաթուղիներ» ընկերությունը կատարում է ՀՀ-ի հետ կնքված կոնցեսիոն պայմանագրի բոլոր կետերը. Բելոզյորով