Բայրամովը լուրջ առաջընթաց է տեսնում հայ-ադրբեջանական հարաբերություններում

Ադրբեջանի ԱԳ նախարար Ջեյհուն Բայրամովը հեռախոսազրույց է ունեցել Մեծ Բրիտանիայի Եվրոպայի, Հյուսիսային Ամերիկայի և անդրծովյան տարածքների հարցերով պետնախարար Սթիվեն Դաութիի հետ։ Այս մասին հայտնում է Ադրբեջանի արտաքին գործերի նախարարությունը։

Հեռախոսազրույցի ընթացքում քննարկվել են երկու երկրների համագործակցության օրակարգը, տարածաշրջանում տիրող իրավիճակը և հայ-ադրբեջանական խաղաղ գործընթացը։

Բայրամովը նշել է, որ «լուրջ առաջընթաց է նկատվում ադրբեջանական կողմի նախաձեռնած խաղաղ համաձայնագրի շուրջ բանակցային գործընթացում»։

Նրա խոսքով, ւնդհանուր առմամբ աշխատանքներ են տարվում խաղաղության պայմանագրի նախագծի համակարգման ուղղությամբ:

Ադրբեջանցի դիվանագետը կրկին անհիմն պնդումներ է արել հայկական կողմի հասցեին՝ նշելով, որ գործընթացի «հիմնական խոչընդոտը Հայաստանի Սահմանադրության մեջ առկա տարածքային պահանջներն են Ադրբեջանի նկատմամբ»։