Առուշ Առուշանյանի վերաբերյալ որոշումը դատարանը չի հրապարակել

Գորիսի քաղաքապետ Առուշ Առուշանյանի գործով որոշման հրապարակումը Վերաքննիչ քրեական դատարանի դատավոր Մնացական Հարությունյանը պետք է աներ նախորդ տարվա վերջին՝ դեկտեմբերի 24-ին, սակայն այն չի հրապարակվել։

Առուշանյանի պաշտպան Սերգեյ Մարաբյանը «Հրապարակ»-ի հետ զրույցում ասաց, որ որոշման հրապարակման ժամկետը երկարաձգվել է մինչեւ հունվարի 15-ը։ Իսկ թե որն է երկարաձգման պատճառը, պաշտպանը նշեց․ «Հունվարի 15-ին հրապարակում կլինի․․․ Հնարավոր է՝ ծանրաբեռնվածությունն է, հասկանալի է՝ Նոր տարուց առաջ ահագին գործեր կուտակվում են, հասկանալի է՝ իրենք ծանրաբեռնված են, դրա համար մենք ըմբռնումով ենք մոտենում»։

Նշենք, որ թե՛ դատախազությունը, թե՛ պաշտպանական կողմը բողոքարկել էր առաջին ատյանի դատավոր Վարսենիկ Մելքոնյանի որոշումը։ Բողոքը քննվել է գրավոր ընթացակարգով։ Հիշեցնենք, որ նախորդ տարվա սեպտեմբերի սկզբին դատարանը Գորիսի քաղաքապետի դատավճիռը փոխեց եւ հետաձգված պատիժն ու պաշտոնավարումը 5 տարով դադարեցնելու փոխարեն նրան դատապարտեց 1 տարի 8 ամիս ազատազրկման։ 33-ամյա Առուշ Առուշանյանը բանտ կտեղափոխվի, երբ որոշումն ուժի մեջ մտնի, այսինքն` երբ անցնի մյուս դատական ատյաններով։ Գորիսը 7 տարի կառավարող քաղաքապետը դեռ 2022-ին էր մեղավոր ճանաչվել՝ պաշտոնեական լիազորությունները չարաշահելու, ինքնիրավչության եւ դիտավորությամբ առողջությանը վնաս պատճառելու համար։ Դատավճիռն ուժի մեջ էր մտել 2024-ի հուլիսին։ Նրան 5 տարի ժամկետով արգելվել է զբաղեցնել համայնքապետի պաշտոնը։ Պրոբացիայի ծառայությունը դիմել էր Գորիսի ավագանուն, որ քաղաքապետի լիազորությունները դադարեցվեն, ավագանին հրաժարվել էր պաշտոնանկ անել քաղաքապետին, հիմնավորել էր, որ նման լիազորություն չունի։ Դրանից հետո Պրոբացիայի ծառայությունը դիմեց դատարան, պահանջելով Առուշանյանի՝ 5 տարով պաշտոնը թողնելու պատիժը փոխարինել ազատազրկմամբ։