Չկա ավելի գործուն պատասխան Ադրբեջանի պահանջին, քան ՀՀ-ի՝ ԵՄ անդամակցության մասին օրինագծի ընդունումը. Սարգսյան

«Հանրապետություն» կուսակցության ղեկավար Արամ Սարգսյանը կարծում է՝ չկա ավելի գործուն պատասխան ԵՄ դիտորդական առաքելության խնդրով Ադրբեջանի պահանջին, քան Հայաստանի ԵՄ անդամակցության մեկնարկի մասին օրինագծի ընդունումը։

«Սրանով ՀՀ-ն նոր դռներ է բացում ԵՄ ներկայության և համագործակցության՝ բոլոր ուղղություններում։

Ադրբեջանը չի կարող ՀՀ-ԵՄ հարաբերությունների սերտացումը դիտարկել թշնամական, քանի որ իր եղբայր Թուրքիան նույնպես ջանում է նման հարաբերություններ ստեղծել։

Հայաստանի ԵՄ անդամակցության մեկնարկի մասին օրինագիծը ԱԺ քվեարկությամբ հաստատելը, անկասկած, պատմական իրադարձություն է և էլ ավելի էական է դառնում ԱՄՆ ընտրություններից հետո ստեղծված աշխարհաքաղաքական իրավիճակում։

Իմ խորհին շնորհակալությունը այն 60.000 և ավելի մարդկանց, որ ստորագրեցին և վստահեցին մեզ։ Մենք միասին ենք կերտելու մեր, մեր զավակների ու թոռների ապագան։ Շնորհակալություն նաև ԱԺ ՔՊ խմբակցությանը՝ իրավիճակը ճիշտ գնահատելու և օրինագծին կողմ քվեարկելու համար։
Ցանկացած 1000 մղոնանոց ճանապարհ սկսվում է առաջին քայլից։

Աստված օրհնի Հայաստանը»,- գրել է Սարգսյանը:

Հիշեցնենք՝ ՀՀ Ազգային ժողովը 64 կողմ, 7 դեմ ձայներով երկրորդ ընթերցմամբ և ամբողջությամբ ընդունել է Եվրամիության անդամակցության մասին օրինագիծը։

Օրինագիծն առաջին ընթերցմամբ ընդունվել էր փետրվարի 12-ին։