Հրապարակվել է ENNHRI-ի` Եվրոպայում իրավունքի գերակայության վիճակի վերաբերյալ զեկույցը

2025 թվականին հրապարակվել է Մարդու իրավունքների ազգային հաստատությունների եվրոպական ցանցի (ENNHRI)` Եվրոպայում իրավունքի գերակայության վիճակի վերաբերյալ զեկույցը։ Այս մասին հայտնում են ՄԻՊ գրասենյակից։

Զեկույցն ուրվագծում է իրավունքի գերակայության ներկայիս միտումներն ու մարտահրավերները, մանրամասն անդրադարձ կատարում ինչպես իրավունքի գերակայության երաշխավորման վիճակին եվրոպական մակարդակում, այնպես էլ անդամ պետություններում առկա իրադրությանը՝ ներկայացնելով իրավունքի գերակայության երաշխավորմանն ուղղված պրակտիկայի բարելավման առաջարկություններ:

Զեկույցը, մասնավորապես, անդրադարձ է կատարում իրավունքի գերակայության և մարդու իրավունքների միջավայրի վրա ազդող շարունակական մարտահրավերներին, որոնց բախվում են եվրոպական ցանցի անդամ հաստատությունները:

Անդրադառնալով ՀՀ մարդու իրավունքների պաշտպանի հաստատությանը՝ զեկույցը շեշտադրում է Հայաստանի Մարդու իրավունքների պաշտպանի իրականացրած աշխատանքներն ինչպես կին մարդու իրավունքների պաշտպանների պաշտպանության, մեդիայի ազատության, բազմակարծության, լրագրողների անվտանգության, հավաքների ազատության, անհամաչափ ուժի կիրառման, ատելության խոսքի բացառման և մի շարք այլ ուղղություններով, այնպես էլ ընդգծում այն մարտահրավերները, որոնց բախվել են Պաշտպանն ու աշխատակազմը վերոնշյալ աշխատանքների իրականացման ընթացքում:

Այսպես, զեկույցի` «Մարդու իրավունքների ազգային հաստատությունների գործունեության նպաստավոր և անվտանգ միջավայրի ապահովում» բաժնում առանձնացվել են այն ՄԻՊ հաստատությունները, որոնք ենթարկվել են հարձակումների, ատելության խոսքի դրսևորման կամ ահաբեկման։

Մարդու իրավունքների ազգային հաստատությունների դեմ առցանց հարձակումների և ատելության խոսքի դրսևորումներ են գրանցվել Հայաստանի, Բոսնիա և Հերցեգովինայի, Խորվաթիայի, Լյուքսեմբուրգի և Սլովակիայի ՄԻՊ հաստատությունների պարագայում, իսկ Խորվաթիայի, Մոնտենեգրոյի և Լեհաստանի ՄԻՊ-երը ստացել են իրենց ուղղված գրավոր սպառնալիքներ։