Վլադիմիր Պուտինը Վրաստանի դեմ պատերազմը որպես «փորձագնդակ» է օգտագործել, որպեսզի տեսնի ագրեսիայի հանդեպ միջազգային արձագանքը, որին հաջորդեց Ղրիմի անեքսիան և Ուկրաինայում լիածավալ պատերազմը։
Այս գնահատականը «Դոյչե վելլի» վրացական նախագծին հայտնել է Քրիստոնեա-դեմոկրատական իշխող կուսակցությունից Գերմանիայի բունդեսթագի պատգամավոր Կնուտ Աբրահամը։
Գերմանացի խորհրդարանականի հայացքով՝ Պուտինը, մասնավորապես, «ցանկացել է թեսթավորել՝ որքանո՞վ են ամուր Վրաստանի հետ բարեկամության և համերաշխության մասին ամերիկացիների հայտարարությունները, որքանո՞վ է Վաշինգտոնը պատրաստ «անհրաժեշտության դեպքում այդ բարեկամությունը ամրապնդել ռազմական միջոցներով» և ստացել է շատ հստակ պատասխան»։
Օգոստոսի 8-ին լրանում է ռուս-վրացական «հնգօրյա պատերազմի» 18 տարին։ Այս առումով, թերևս, արժե հիշել երկու կարևորագույն իրադարձություն։ Վրաստանի դեմ պատերազմից մոտ մեկ ամիս առաջ ՌԴ նախագահի պաշտոնում «ընտրված» Դմիտրի Մեդվեդևը արտասահմանյան առաջին այցը կատարել է Բաքու, կողմերը ստորագրել են «Ռազմավարական գործընկերության մասին» երկրորդ հռչակագիրը։
Հանդիսանալով Վրաստանի դաշնակիցը՝ որպես ՎՈՒԱՄ կազմակերպության անդամ, Ադրբեջանը չի միացել Ռուսաստանի ագրեսիայի դատապարտմանը։
Նույն տարվա նոյեմբերի 2-ին ՌԴ նախագահ Մեդվեդևը մերձմոսկովյան Մայենդորֆ նստավայրում հյուրընկալել է Հայաստանի և Ադրբեջանի նախագահներին։
Բանակցությունների արդյունքում կողմերը ստորագրել են «Մայենդորֆյան հռչակագիրը», որի իմաստով ղարաբաղյան հակամարտությունը «խոչընդոտում է Հարավային Կովկասի կայունությանը և տնտեսական ինտեգրացիային»։
Մայենդորֆում առաջին անգամ Հայաստանը ընդունել է, որ ղարաբաղյան հակամարտությունը պետք է կարգավորվի «ընդունված որոշումների և այլ փաստաթղթերի հիման վրա»։ Հռչակագրում ոչ մի խոսք չկա ղարաբաղյան կարգավորման «մադրիդյան սկզբունքների» մասին։
Կարելի է ասել, որ Ադրբեջանը և Ռուսաստանը «թեսթավորել» են, թե ԱՄՆ-ը և Ֆրանսիան որքանո՞վ են հավատարիմ «մադրիդյան սկզբունքներին» և պարզել, որ Հայաստանը այդ հարցում Վաշինգտոնից և Փարիզից «հարկ եղած դեպքում» հիմնավոր աջակցություն չի ստանա։
Մայենդորֆից հետո Ստեփանակերտը շարունակաբար պնդել է, որ «մադրիդյան սկզբունքներով» կարգավորումը «ոչ թե խաղաղություն, այլ նոր պատերազմ կբերի»։
Բաց մի թողեք
ԱԳ նախկին նախարարին կբանտարկե՞ն. Լուսանկար
Ռուսաստանի Հյուսիսային Կերայից «քառասուն բալիստիկ հրթիռ և արձակման վեց կայան է ստացել»
Ադրբեջանն աջակցել է Վրաստանին․ հայտարարություն