Փաշինյանի կառավարման արդյունքում ունենք կռացած պետություն

«Հրապարակի» զրուցակիցը քաղաքագետ, «Դեմոկրատական այլընտրանք» կուսակցության առաջնորդ Սուրեն Սուրենյանցն է:

– Սպիտակ տանը տեղի է ունեցել Նիկոլ Փաշինյանի հանդիպումը Միացյալ Նահանգների փոխնախագահ Ջեյմս Դեյվիդ Վենսի հետ։ Իշխանական շրջանակները սա ներկայացրին որպես հաղթանակ, հերթական հաջողությունը` Հայաստան-ԱՄՆ հարաբերություններում: Ինչո՞վ էր այդ հանդիպումն այդքան կարեւոր ու առանցքային:

– Հայաստանից ցանկացած բարձրաստիճան պաշտոնատար անձ, երբ աշխատանքային այցով գտնվել է Միացյալ Նահանգներում, անպայման փոխնախագահի կամ պետքարտուղարի կողմից ընդունելության է արժանացել, սա ԱՄՆ-ում ընդունված ավանդույթ է, եւ այդտեղ չկա ոչ մի զարմանալու բան: Բայց տարածված լուսանկարն ինձ վրա չափազանց տխուր տպավորություն թողեց, արարողակարգային որեւիցե բաղադրիչ պահպանված չէր, ոչինչ չէր երեւում, շատ անհասկանալի լուսանկար էր, որն ակնհայտորեն արվել էր հեռախոսով:

– Այս այցից որ լուսանկարը տեսանք` նույն խեղճ տպավորությունը ստացանք: Հայաստանի իշխանություններն ինչո՞ւ են դրսում այսքան խեղճուկրակ վիճակում:

– Ունենք կռացած պետություն, որը Նիկոլ Փաշինյանի վարած քաղաքականության արդյունքում է այս վիճակին հասել:

– Իսկ ԱՄՆ կատարած այցն առհասարակ ինչի՞ մասին էր, ո՞րն էր այս այցի նպատակը:

– Ես այս այցին բացասական չեմ վերաբերվում, պարզապես կարելի էր ավելի հստակ, հասկանալի օրակարգով մեկնել ԱՄՆ, որպեսզի այցն օգտակար լիներ, հակառակ դեպքում այն նմանվեց ակտիվիզմի, զրոյական արդյունքներով:

– Օրինակ` ի՞նչ հարցեր կարող էր բարձրացնել ԱՄՆ-ում, որ այդպես էլ չբարձրացրեց: Գերիների մասին կարո՞ղ էր խոսել:

– Գերիների հարց, հայ-ադրբեջանական հարաբերությունների հարց, կարող էր խոսել Ադրբեջանի ագրեսիվ վարքագծի մասին, բայց, ինչպես տեսանք, ոչ մի նման հարց չբարձրացրեց:

– Ադրբեջանում խոշտանգվող հայ ռազմաքաղաքական ղեկավարներին խարազանելու, գնդակահարելու կոչեր է անում «Դոգ» մականունով մեկը, որը քաղաքական հայտ է ներկայացրել եւ բնակվում է ԱՄՆ-ում: Դուք կարծես թե նրա հետ ինչ-որ օնլայն քննարկումների եք մասնակցում: Դուք է՞լ եք գերիներին ողջակիզելու կողմնակից:

– Գերիների հարցում իմ դիրքորոշումը պարզ է, ես բազմաթիվ անգամներ ասել եմ իմ դիրքորոշումը: Այդ մարդկանց պետք է համակողմանի աջակցություն ցուցաբերել:

– Բա ինչպե՞ս եք նրանց հասցեին վայրահաչողի հետ քաղաքական քննարկումներ ունենում:

– Քննարկումը եղել է Գյումրու ընտրությունների հետ կապված: Մենք էինք կազմակերպել այդ քննարկումը, իսկ Վարդան Ղուկասյանը դրան մասնակցել է:

– Ինչպե՞ս եք պրոադրբեջանական գաղափարներ կրող, բանտում գտնվող հայ մարդկանց խոշտանգման կոչեր անող մարդուն քննարկման հրավիրում:

– Մի րոպե, ինչո՞ւ եք մի քանի հարց խառնում իրար: Գյումրու ընտրությունների հետ կապված միջոցառում ենք ունեցել, որին հրավիրված են եղել բոլոր ընդդիմադիր կուսակցությունները, արձագանքել է Վարդան Ղուկասյանը:

– Բայց այդ տեսակին, փաստորեն, համարում եք քաղաքական գործիչ, գործոն եք դարձնում:

– Բոլորին հրավիրել էինք, մասնակցել է Վարդան Ղուկասյանը:

– Բոլորը քաղաքական գործիչներ են, իսկ նա ԱՄՆ-ում ապրող շանտաժիստ է ընդամենը:

– Եթե մասնակցում է ընտրություններին, ես ի՞նչ անեի, ասեի` մի՞ մասնակցիր: Մի քանի հարց իրար եք խառնում, Ձեր մոտեցումը սխալ է: Ես Գյումրիում բոլոր ընդդիմադիր ուժերին հրավիրել էի քննարկման, մյուսները չեն մասնակցել, Վարդան Ղուկասյանը մասնակցել է:

– Հրավիրել էիք ադրբեջանական շահեր սպասարկողին:

– Դա իմ խնդիրը չէ, թե ում շահերն է սպասարկում, դա իրավապահների խնդիրն է: Դա Ձեր որակումն է, ես չեմ անի նման պնդում:

– Ինչո՞ւ Ձեր խնդիրը չէ` ողջ օրը գերիներին ոչնչացնելու կոչեր է անում, քի՞չ է:

– Նորից կասեմ՝ քննարկումը վերաբերել է Գյումրու ընտրություններին, եթե Ձեր նշած թեման քննարկվեր, ես այլ կեցվածք կորդեգրեի: Ես չեմ կարող կուսակցությունների միջեւ խտրականություն դնել:

– Այդ դեպքում ՔՊ-ին էլ հրավիրեիք:

– Հրավերը բաց տեքստով դրված է եղել բոլոր կուսակցությունների համար, առանձին ոչ մի անհատի կամ կուսակցության չեմ հրավիրել: