Նիկոլ Փաշինյանն ազդարարել է, որ առաջիկայում «հատիկ առ հատիկ» ներկայացնելու է ապօրինի գույքի բռնագանձման գործընթացի արդյունքում պետությանը վերադարձվող գույքերի ցանկը: Կասկածից վեր է, որ սա լինելու է Նիկոլ Փաշինյանի նախընտրական քարոզչության հերթական «գիծը»:
Ինտրիգն այստեղ այն է, թե արդյո՞ք այդ «գիծը» որևէ կերպ համադրելի լինելու է զուգահեռ ընթացող մյուս պրոցեսի՝ այսպես ասած ներիշխանական թիմի «ֆիլտրացիայի», վերախմբավորման հետ:
Այսինքն՝ «ապօրինի գույքի բռնագանձման» գործընթացը որևէ կերպ կսկսի՞ առնչություն ունենալ ոչ միայն նախկին կառավարող համակարգի, այլ հենց Քաղաքացիական պայմանագիր կուսակցության շրջանակի հետ, այդ թվում նաև կառավարող համակարգում ընդգրված:
Այդպիսով, Փաշինյանը կարող է փորձել ստանալ կրկնակի էֆեկտ: Ընդ որում, հատկանշական է մի հանգամանք: Նիկոլ Փաշինյանը թեմային անդրադառնում է Հայաստանում ԱՄՆ դեսպանության տարածած հաղորդագրության ֆոնին, որն այն մասին է, որ Սրբուհի Գալյանին ԱՄՆ պետքարտուղարությունը ճանաչել է աշխարհում կոռուպցիայի դեմ պայքարի առաջամարտիկների շարքում, այն աշխատանքի համար, որ Գալյանը գլխավոր դատախազի տեղակալի պաշտոնում իրականացրել է հենց ապօրինի գույքի բռնագանձման գործընթացի առնչությամբ:
Գալյանին մրցանակը հանձնել է հենց պետքարտուղար Բլինքենը: Ինչպես հայտնի է, Սրբուհի Գալյանը շաբաթներ առաջ նշանակվեց արդարադատության նախարար, ընդ որում՝ ինչն ուշագրավ է, նա նշանակվեց բավականին տեւական ներթիմային պրոցեսի խաղարկման արդյունքում, որ հմտորեն կազմակերպում էր Նիկոլ Փաշինյանը:
Հազիվ թե Փաշինյանը պատահաբար է ընտրել Ծաղկաձորում հողամասի՝ պետությանը վերադարձնելու մասին հրապարակման օրը: Նա փորձել է լինել կամ ցույց տալ, որ նույն գծի վրա է այն տեղեկատվության հետ, որ Գալյանի վերաբերյալ հրապարակել էր ԱՄՆ դեսպանատունը:
Այդպիսով, Նիկոլ Փաշինյանը փորձում է այդ հանգամանքից էլ քաղել քարոզչական առավելագույնը՝ թափանցիկ ակնարկով ասոցացվելով ԱՄՆ պետքարտուղարության գնահատականին:
Նկատելի է, որ Նիկոլ Փաշինյանը վերջին շրջանում ունի այսպես ասած արևմտամետ տրամադրություններով ընտրողներին «կորցնելու» մտավախություն, ինչով էլ պայմանավորված էր նաև նրա հայտարարությունը ԵՄ-ին անդամակցության հարցով հանրաքվեի նախաձեռնության հանդեպ: Թերևս նույն հաշվարկն էին պարունակում նաև լուսանկարները Փարիզի Աստվածամոր տաճարի վերաօծման արարողությունից:
Սակայն այսօր Հայաստանի առաջ լրջորեն կանգնած է հարցը, թե Երևանն ի՞նչ բովանդակային ու առարկայական օրակարգ է պատկերացնում արևմտյան ուղղությամբ աշխատանքի համար թե՛ ԱՄՆ, թե՛ ԵՄ հետ, որոնք իրենք էլ այսօր գտնվում են որոշակի տրանսֆորմացիաների փուլում:
Նախընտրական «անտուրաժն» անցողիկ է, իսկ պետական շահը պահանջում է հիմնարար իմաստներ:
Բաց մի թողեք
«Կույր կետեր». Մայիսյան անօդաչու թռչող սարքերի մասին տագնապը ընդգծում է լիտվացիների համար օդային հարձակման ապաստարանների վատ հասանելիությունը
Ալբանիայում շարունակվում են Թրամփի ընտանիքի հետ կապված հանգստավայրի դեմ բողոքի ցույցերը
Մագյարը պնդում է, որ Ուկրաինայի հետ կնքված փոքրամասնությունների իրավունքների վերաբերյալ համաձայնագիրը կվերացնի ԵՄ անդամակցության վետոն