Ֆինլանդիայի նախագահ Ալեքսանդր Ստուբը երկօրյա պաշտոնական այցով ժամանել է Ղազախստան: Այդ մասին պաշտոնական հաղորդագրություն է տարածել Ղազախստանի նախագահի աշխատակազմի հանրային կապերի վարչությունը:
Հոկտեմբերի 28-ին կայացել է երկու նախագահների առանձնազրույցը, ապա Կասիմ Ժոմարթ Տոկաևը և Ալեքսանդր Ստուբը մասնակցել են Աստանայում գումարված ղազախա-ֆիննական գործարար խորհրդաժողովին:
Բանակցությունների ավարտին տարածվել է Ղազախստանի և Ֆինլանդիայի նախագահների համատեղ հայտարարությունը, որի չորորդ կետով կողմերը վերահաստատում են միջազգային իրավունքի, ՄԱԿ-ի Կանոնդրության հիման երկկողմ հարաբերությունները խորացնելու պատրաստակամությունը՝ «հարգելով բոլոր երկրների անկախությունը, ինքնիշխանությունը և տարածքային ամբողջականությունը»:
Կողմերը գտնում են, որ միջազգային և միջպետական հարաբերություններում առկա և ծագող բոլոր տարաձայնությունները «պետք է կարգավորվեն խաղաղ-բանակցային ճանապարհով և բացառապես դիվանագիտական գործիքակազմի կիրառմամբ»:
Ֆինլանդիայի նախագահի Ղազախստան այցից երկու օր առաջ կայացել է Վլադիմիր Պուտինի և Կասիմ Ժոմարթ Տոկաևի հեռախոսազրույցը, որի ընթացքում վերահաստատվել է վերջինիս Մոսկվա պետական այցը: Այն կկայանա նոյեմբերին, կոնկրետ օր դեռևս չի նշվում:
Նոյեմբերի 6-ին Վաշինգտոնում նախատեսված է ԱՄՆ-Կենտրոնական Ասիա գագաթաժողով: Ֆինլանդիայի նախագահ Ստրուբը, ով նախկինում պաշտոնավարել է որպես արտաքին գործերի նախարար, հայտնի է ուկրաինական կարգավորման հարցում կոշտ դիրքորոշմամբ: Ֆինլանդիան ՆԱՏՕ-ին անդամակցել է Ուկրաինայի դեմ Ռուսաստանի հարձակումից հետո:
Տպավորություն է, թե նա, որպես Ֆինլանդիայի արտգործնախարարի պաշտոնում ավելի վաղ Ղազախստան այցելած և Տոկաևի հետ անձնական ծանոթություն ունեցող պետական գործիչ, Աստանա է մեկնել ոչ այնքան գործարար խորհրդաժողովին մասնակցելու, որքան Կասիմ Ժոմարթ Տոկաևի հետ համատեղ հայտարարություն տարածելու նպատակով, որով պաշտոնական Աստանան ևս մեկ անգամ հավաստում է բոլոր երկրների ինքնիշխանությունը և տարածքային ամբողջականությունը հարգելու և վիճելի հարցերի խաղաղ կարգավորելու հանձնառությունը:
Ուկրաինայի հարցում Վլադիմիր Պուտինին այդպես էլ չի հաջողվում ստանալ ոչ միայն ԱՊՀ, այլև ՀԱՊԿ և ԵԱՏՄ անդամ պետությունների աջակցությունը: Ղազախստանի և Ֆինլանդիայի նախագահների համատեղ հայտարարությունն, անկասկած, Տոկաևի Մոսկվա այցին ընդառաջ Պուտինին ուղերձ է: Տոկաևը բացահայտ հասկացնում է, որ Ուկրաինայի հարցում Ղազախստանն Ռուսաստանի ռազմավարական դաշնակիցը չէ:
Բաց մի թողեք
Էրդողանը միջազգային դերակատարներին «թուրքական աշխարհ» նախագիծը չի ներկայացնում
Պուտինը Թրամփին մարտահրավե՞ր է նետում, թե՞ «սպառնալիքը» դիվանագիտական ուղերձ է
Ստյոպա Ասատրյանը անդրադարձել է Հովհաննավանքի կիրակնօրյա պատարագին կեղծ դպիրին