Հրապարակվել է Հայաստանի տնտեսական ցուցանիշների եռամսյակային վիճակագրությունը՝ 2025 թվականի առաջին երեք ամիսների համար:
Տնտեսական ակտիվությունը 2024 թվականի հունվար-մարտի համեմատությամբ, աճել է 4 տոկոսով, սակայն այդ ֆոնին ավելի քան 18 տոկոսով նվազել է արդյունաբերական արտադրանքի, ավելի քան 60 տոկոսով՝ արտահանման ծավալը:
Այլ կերպ ասած, տնտեսական ակտիվության աճի ֆոնին, այդուհանդերձ, նվազել է Հայաստանի տնտեսության արտադրողականության և արտահանելի հատվածի ծավալը: Եռամսյակային տվյալները, իհարկե, հարաբերական են, բավարար չեն այսպես ասած հեռուն գնացող եզրակացություններ անելու համար, և, ըստ այդմ, անհրաժեշտ է առնվազն կիսամյակային նիշ:
Բայց եռամսյակային տվյալները արտացոլում են միտումներ, հատկապես նախորդ ժամանակահատվածի հետ համեմատությամբ:
Եվ այդ միտումների համատեքստում ակնառու է դառնում, որ պատկերը դրական չէ, և բավականին մտահոգիչ է: Առավել ևս, որ ընդհանուր առմամբ՝ եթե վիճակագրական առումով ուղիղ համեմատական է նախորդ տարվա առաջին եռամսյակի հետ, որտեղ պատկերը դարձյալ խնդրահարույց է, ապա հենց միտումների իմաստով արտացոլում է նախորդ ամբողջ տարվա պատկերը:
Այստեղ, իհարկե, պատճառների հարցում գործ ունենք բավականին մեծ համախմբի հետ, որի հիմքում, սակայն ընկած է տնտեսական քաղաքականությունը: Եթե «համառոտագրենք» այդ քաղաքականությունը, ապա հնարավոր է բնորոշել՝ «բյուջեի պաշտամունք» կամ ֆետիշացում:
Այն, որ պետական բյուջեն և դրա եկամուտների ավելացումը ունեն առանցքային նշանակություն ցանկացած պետության համար, իհարկե, վեր է կասկածից: Բայց պետական տնտեսական քաղաքականության նպատակը պետք է լինի ոչ թե բյուջեն, այլ տնտեսական աճը, տնտեսության զարգացումը, կառուցվածքային դիվերսիֆիկացիան, տնտեսության արտադրողական, արդյունաբերական, արտահանելի ներուժի աճը, հետևաբար արտաքին կոնյուկտուրայից հնարավորինս նվազ կախվածությունը: Բյուջեն կարող է լինել այդ ամենի արդյունքը:
Եթե այդ ամենի համապատկերում կա նվազման ակնառու միտում, ապա բյուջեի եկամուտների աճը կարող է լինել միանգամայն խաբուսիկ: Ընդ որում՝ վտանգավոր խաբկանք, որովհետև այդ դեպքում բյուջեի եկամուտների ֆետիշացումը կարող է ստեղծել իրավիճակ, երբ բյուջեն աճող տնտեսության, զարգացող, կենսունակ տնտեսության արդյունք լինելու փոխարեն, կարող է դառնալ «նվաղող» տնտեսությունն առանց այդ էլ քամող երևույթ:
Այդ ամենի հետևանք է, որ Հայաստանի համար ավելի է աճում պետական պարտքի, այդ թվում արտաքին պարտքի բեռը:
Բաց մի թողեք
Անօդաչու թռչող սարքի հարձակում Լայպցիգում. հետքերը, ըստ երևույթին, տանում են դեպի ռուսական հատուկ ծառայություններ
Գազի իրական գինը միայն հազար խորանարդ մետրի դիմաց վճարվող դոլարը չէ
Արդյոք իշխանությանը մոտ կանգնած ընկերության հաշվետվությունը ստուգվում է նույն խստությամբ