Թուրքիայի ոստիկանությունը հերթական հատուկ գործողությունն է իրականացրել: Ձերբակալվել են Ադանայի, Անթալիայի և Ադըյամանի քաղաքապետները, որ ներկայացնում են ընդդիմադիր Ժողովրդա-հանրապետական կուսակցությունը: Թուրքական լրատվամիջոցները հայտնում են, որ այդ առթիվ ԺՀՊ առաջնորդ Օզելը կուսակցության գործադիր մարմնի արտահերթ նիստ է հրավիրել:
Ակնկալվում է, որ նիստի արդյունքներով Ժողովրդա-հանրապետական կուսակցությունը հանդես կգա հայտարարությամբ: Աննող շաբաթասկզբին կոռուպցիայի մեղադրանքով ձերբակալվել է Իզմիրի նախկին քաղաքապետ Սոյերը, որ նույնպես ԺՀԿ անդամ է:
Օզելը շաբաթասկզբին Ստամբուլի Սարաչխանե հրապարակում բազմամարդ հանրահավաքի մասնակիցներին ասել է, որ Էրդողանն այլևս «նախագահ չէ, այլ՝ խունտայի ղեկավար»: ԺՀԿ առաջնորդը հայտարարել է, որ կուսակցությունն արդեն քսան միլիոն ստորագրություն է հավաքել և նախագահի թեկնածու կառաջադրի Ստամբուլի ձերբակալված քաղաքապետ Իմամօղլուին:
Թուրքիայի դատախազությունը բողոքարկել է Ժողովրդա-հանրապետական կուսակցության վերջին համագումարում Օզելի ընտրության օրինականությունը: Դատախազությունը համարում է, որ քվեարկության արդյունքները կեղծվել են:
Սպասվում է, որ մոտ ապագայում դատարանը կքննի այդ հարցը: Հավանական է, որ դատարանն Օզելին կզրկի Ժողովրդա-հանրապետական կուսակցության առաջնորդի կարգավիճակից: Այդ դեպքում ԺՀԿ-ն ստիպված կլինի նոր արտահերթ համագումար հրավիրել:
ԺՀԿ-ն ներկայացնող երեք քաղաքապետի ձերբակալությունն, ամենայն հավանականությամբ, Օզելի դիրքերը թուլացնելու նպատակ է հետապնդում:
Այս ֆոնին խիստ անհանգստացնող հայտարարություն է տարածել Թուրքիայի ԱԳՆ պաշտոնական ներկայացուցիչ Քեչելին: Ըստ տեղեկությունների՝ անցած շաբաթ Իրաքի Քիրկուկ քաղաքի արվարձաններից մեկում տեղական կառավարման մարմին է ձևավորել, որի կազմում թուրքմեն բնակչության ներկայացուցիչներ չեն ընդգրկվել:
Զայրացած թուրքմենները նախ հանրահավաք են անցկացրել, ապա շրջափակել Քիրկուկ-Էրբիլ մայրուղին: Թուրքիայի ԱԳՆ պաշտոնական ներկայացուցիչն Իրաքի իշխանություններին կոչ է արել «հարթել թյուրիմացությունը և թուրքմեն հայրենակիցների իրավունքները լիովին հարգել»:
Թուրքիան ֆորմալ առումով Իրաքի հետ համագործակցության պայմանագիր ունի, բայց հարաբերությունները շարունակում են լարված մնալ: Ռեջեփ Թայիփ Էրդողանը վերջերս օրակարգ է բերել «Զարգացման ճանապարհի» խնդիրը:
Խոսքն իրաքյան Բասրան Թուրքիայի միջերկրածովյան նավահանգիստներին կապող մայրուղու կառուցման մասին է, որ պետք է անցնի Իրաքի թուրքմենաբնակ տարածքներով, հատի իրաքյան Քրդստանը և մտնի Թուրքիա: Դա ակնհայտորեն Իրաքի նկատմամբ «նեօսմանական հսկողություն» հաստատելու նախագիծ է:
Ավելի վաղ Թուրքիան Իրաքի կենտրոնական իշխանությունների հետ քննարկել է Մոսուլի շրջանի թուրքմեններին ինքնավարություն շնորհելու հարցը, բայց առաջընթացի հասնել չի հաջողվել: Իրաքի սահմանադրությամբ ազգային փոքրամասնությունները միայն տեղական մարմիններում կարող են ներկայացված լինել:
Ըստ երևույթին, Քիրկուկի թուրքմենական «ապստամբությունը» Բաղդադի և Անկարայի միջև լուրջ տարաձայնությունների վկայություն են:
Թուրքիայի ներքին և արտաքին քաղաքական «տենդն», անկասկած, Մերձավոր Արևելքում «նոր աշխարհագրության հաստատման» շուրջ մրցակցության դրսևորում է: Զգաստացնող է, որ այն համընկնում է հայ-թուրքական զգուշավոր երկխոսության մեկնարկին:
Մեծ է հավանականությունը, որ արտաքին որոշ դերակատարներ փորձում են Հայաստան-Թուրքիա կարգավորմանը խոչընդոտել:
Բաց մի թողեք
Մեծ Բրիտանիային չի կարելի թողնել ինքնուրույն որոշելու իր ապագան
Եվրոպական տեխնոլոգիական ընկերությունների գործադիր տնօրենները ցանկանում են ուղիղ կապ ԵՄ քաղաքականության մշակման համար
Ջենրիկ. «Բըրնհեմը կասկածելի պոլո շապիկով Քիր Սթարմերն է»