Կրակոցներ Էջմիածնի գազալցակայաններից մեկի մոտ. հայտնաբերվել են տարբեր հրազենից կրակված պարկուճներ, կա վիրավոր

Սեպտեմբերի 14-ին կրակոցներ են հնչել Արմավիրի մարզում։

Ժամը 07:00-ի սահմաններում ՀՀ Ներքին գործերի նախարարության ոստիկանության քրեական ոստիկանության գլխավոր վարչությունում և նույն վարչության Արմավիրի մարզի քրեական վարչությունում օպերատիվ տեղեկություններ են ստացվել, որ Երևան-Արմավիր ավտոճանապարհի Վաղարշապատ քաղաքի սկզբնամասում ձախակողմյան հատվածում՝ գազալցակայանի մոտ, կրակոցներ են հնչել։

Ինչպես հայտնում է Shamshyan.com-ը, ժամանել են Արմավիրի մարզի քրեական ոստիկանության ծառայողները, պարզվել է, որ օպերատիվ տեղեկությունը հավաստի է։

Դեպքի վայրում հայտնաբերվել են տարբեր ատրճանակներից կրակած 2 պարկուճ և արնանման հետքեր։

Ըստ օպերատիվ տեղեկությունների` կա վիրավոր, ոստիկաններն ու քննիչները պարզում են՝ արդյոք վիրավորը հիվանդանոց դիմե?լ է, թե տնային պայմաններում է բուժում ստանում։

Դեպքի փաստով Վաղարշապատի քննչական բաժնում նախաձեռնվել է քրեական վարույթ և ոստիկանությունն ու քննչական բաժինը ձեռնարկում են անհրաժեշտ միջոցառումներ՝ դեպքի հանգամանքները պարզելու, կրակոցներ արձակողների ինքնությունը ճշտելու, նրանց և հանցագործության գործիք հրազենները հայտնաբերելու, վիրավորի ինքնությունը ճշտելու և նրան նույնպես հայտնաբերելու ուղղությամբ։