Բացառված չէ, որ Մոջթաբա Խամենեիի «մահվան մասին լուրը չափազանցված» չէ

Բրիտանական The Sun պարբերականը, հղելով Թեհրանում «վստահելի մի աղբյուրի», գրել է, որ Իրանի նոր հոգևոր առաջնորդ Մոջթաբա Խամենեին «ներկայումս գտնվում է կոմայի մեջ»։

Ըստ տեղեկության, «ավիահարվածների արդյունքում նա կորցրել է մի ոտքը, վնասվածքներ ունի ստամոքսի և լյարդի շրջանում»։

Հաջորդ օրը Իսրայելի արտաքին հետախուզության ծառայության Mossad Farsi թելեգրամյան ալիքը պարսկերենով գրառում է տարածել և պնդել, որ «Իրանի նոր հոգեւոր առաջնորդն ամեն ինչ ավարտել է, նախքան որևէ բան կաներ, որովհետեւ նրան այդ պաշտոնում ընտրել են մեռյալ վիճակում»:

Հնարավոր է, «Մոսադը» Իրանի քաղաքացիներին դրդում է, որ չհավատան պաշտոնական տեղեկատվությանը, լուրջ չընդունեն Մոջթաբա Խամենեիի «ուղերձը», որ նախօրեին ըներցել է պետական հեռուստատեսության հաղորդավարը:

Մյուս կողմից փաստ է, որ հոգևոր նոր առաջնորդի ընտրությունից անցել է արդեն չորս օր, բայց նա ոչ միայն հանրությանը չի ներկայացել, այլև իշխանության որևէ ներկայացուցչի հետ հրապարակման արժանացած շփում չի ունեցել:

Ընդդիմադիր Iran Internacional-ի տեղեկություններով՝ Մոջթաբա Խամենեիի մոտ անցյալ ժամանակահատվածում մուտք են ունեցել «շատ սահմանափակ թվով պաշտոնյաներ»:

Լրատվամիջոցն ընդգծել է, որ «նրան երկու անգամ տեսակցել և բուժող բժիշկների հետ խորհրդակցություն է անցկացրել Մասուդ Փեզեշքիանը»: Վերջինս մասնագիտությամբ սրտաբան-վիրաբույժ է և, հաբանաբար, բժիշկների հետ վստահելի հարաբերություններ ունի:

Հոգևոր առաջնորդի շուրջ այս անորոշ և բոլոր առումներով կասկածահարույց իրավիճակում սոցիալական հարթակներում տեսագրություն է տարածվել, թե ինչպես է Իրանի նախագահ Մասուդ Փեզեշքիանը առանց թիկնապահների ուղեկցության շրջում Թեհրանի փողոցներում, շփվում պատահական անցորդների հետ, մտքեր փոխանակում, համատեղ «սելֆի»-ներ անում:

Ո՞րն է Փեզեշքիանի «ի հանրություն հայտնության» մոտիվացիան: Հնարավոր է, դա ժողովրդին գոտեպնդելու նպատակ ունի: Մանավանդ որ մեկ շաբաթից կգա Նավրուզը, որ իրանցիների ամենասիրելի և ավանդական տոնն է, գալիս է հազարամյակների հեռվից:

Բացառված չէ, որ Մոջթաբա Խամենեիի «մահվան մասին լուրը չափազանցված» չէ, և նախագահ Փեզեշքիանը երկրի նոր առաջնորդի ընտրության հարցում «մտադիր է ավելի սկզբունքային դիրքորոշում դրսևորել»:

Որքան էլ ընդունենք, որ անցած երկշաբաթյա շրջանում Իրանը Միացյալ Նահանգներին և Իսրայելին արժանապատիվ, իսկ որոշ դեպքերում շատ արդյունավետ և բավական ցավոտ դիմադրություն է ցույց տվել, կողմերի ռեսուրսները համադրելի չեն:

Իրենց հաշվակրներում, կարծես, սխալվել են թե ԱՄՆ-ը, թե Իրանը. Պարսից ծոցի արաբական միապետությունները չեն միանում Իրանի դեմ պատերազմին, բայց և ամերիկացիներին իրենց տարածքից չեն հեռացնում, իսկ Հորմուզի նեղուցի փակումից շահում է Ռուսաստանը:

Այս իրավիճակում պատերազմի դադարեցումը, երևի, այլընտրանք չունի, բայց դրա համար Վաշինգտոնը և Թեհրանը «քարերը պիտի գոգից թափեն», հրաժարվեն առավելապաշտական հռետորաբանությունից: Ժամանակը սեղմում է:

Մասուդ Փեզեշքիանը կարո՞ղ է Վաշինգտոնի համար բանակցունակ դեմք լինել: Տեսականորեն՝ այո, բայց քաղաքականությունը պահանջում է կոնկրետ քայլեր: Մոջթաբա Խամենեին եթե անգամ ողջ է, ապա, ամենայն հավանականությամբ, գտնվում է կոմայի մեջ:

Նրա անունից խոսում է ԻՀՊԿ հրամանատարությունը: Փեզեշքիանը արմատական քայլի դիմելու ունա՞կ է, ներվերնախավային ռեսուրս ունի՞, թե՞ դիմո՞ւմ է փողոցի օգնությանը: