Իրանին թույլ չի տրվի վճար պահանջել Հորմուզի նեղուցով անցման համար․ Ռուբիո

Միացյալ Նահանգների հետ ձեռք բերված ցանկացած վերջնական համաձայնագիր թույլ չի տա Իրանին վճարներ կամ մաքսատուրքեր սահմանել Հորմուզի նեղուցով անցման համար։

Այս մասին հայտարարել է ԱՄՆ պետքարտուղար Մարկո Ռուբիոն։

«Սա կարգավորվում է օրենքով։ Հորմուզի նեղուցը միջազգային ջրային ուղի է։ Ոչ մի երկրի թույլատրված չէ պահանջել տուրքեր կամ որևէ տեսակի վճար միջազգային ջրային ուղիով անցնելու համար։ Սա նախատեսված է գործող միջազգային իրավունքով»,- ընդգծել է ԱՄՆ պետքարտուղարը լրագրողների հետ զրույցի ժամանակ։

Նրա խոսքով՝ այս կանոնը վերաբերում է աշխարհի բոլոր միջազգային ջրային ուղիներին, և Վաշինգտոնը ակնկալում է, որ նույն մոտեցումը կկիրառվի նաև Հորմուզի նեղուցի նկատմամբ։

«Հետևաբար, չեմ կարծում, որ որևէ մեկին համոզելու կարիք կա։ Կարծում եմ՝ տարածաշրջանի բոլոր երկրները կաջակցեն մեր դիրքորոշմանը»,- հավելել է Ռուբիոն։