Նիկոլ Փաշինյանը Կուրուլթայի ընտրությունների հաջող անցկացման կապակցությամբ Ղազախստանի նախագահ Կասիմ Ժոմարթ Տոկաևի հետ հեռախոսազրույց է ունեցել։
Ըստ պաշտոնական հաղորդագրության, զրուցակիցները «մտքեր են փոխանակել տարածաշրջանային տրանսպորտային ծրագրերի իրականացման գործում համագործակցելու հնարավորությունների շուրջ», Փաշինյանը և Տոկաևը «պայմանավորվել են քննարկումները շարունակել Ղազախստանի նախագահի՝ հոկտեմբերին Հայաստան կատարելիք այցի շրջանակներում»։
Ղրղըզստանի novosti. kg -ն ֆեյսբուքյան էջում գրել է, որ Փաշինյանը և Տոկաևը քննարկել են «նաև Հայաստանի երկաթուղիների կառավարումը ղազախստանյան կողմին փոխանցելու հնարավորությունը» և ընդգծել․ «Հեռախոսազրույցի արդյունքներով Կասիմ Ժոմարթ Տոկաևը հաստատել է հոկտեմբերին Հայաստան պաշտոնական այց կատարելու մտադրությունը»։
Բավական ուշագրավ է, որ ղրղըզստանյան լրատվամիջոցը TRIPP նախագիծը ներկայացրել է որպես ոչ միայն Հայաստանի տարածքով Ադրբեջանը Նախիջևանին կապող «տրանսպորտային միջանցք», այլև «ավելի լայն երթուղու մաս, որ կարող է երկաթուղային հաղորդակցություն բացել Պարսից ծոցի տարածաշրջանների և Սև ծովի միջև»։
Արդյոք Բիշքեկը TRIPP նախագծով հետաքրքվա՞ծ է, թե՞ տեղեկատվությունը վերաբերում է միայն Ղազախստան-Հայաստան հարաբերություններին, պարզ չէ։
Էական է այն, որ Ղազաախստանի նախագահը հաստատել է Հայաստան պաշտոնական այցը։ Դա նշանակում է, որ նա մտադիր է վարչապետ Փաշինյանի հետ քննարկել Հայաստանի երկաթուղիների կառավարումը «ղազախստանյան կողմին փոխանցելու հնարավորությունը»։
Ադրբեջանի արտաքին գործերի նախկին նախարար Զուլֆուգարովը կրկին խոսել է երկաթուղու «Մեղրիի հատվածի նկատմամբ գույքային իրավունքի» մասին։
Նրա կարծիքով, Ադրբեջանը «պետք է հասնի այդ իրավունքի ճանաչմանը, ապա հանդես գա որպես ներդրող»։ Զուլֆուգարովը դարձյալ «հիմնավորել» է, որ խորհրդային շրջանում երկաթուղու «Մեղրիի հատվածը ԽՍՀՄ-ը կառավարել է ոչ թե Երևանի, այլ Բաքվի միջոցով»։
Նախկին արտգործնախարարը, հավանական է, արտահայտում է Ադրբեջանի իշխանությունների «խորքային տեսակետը»։ Այդ հարցում Բաքուն կարող է ապավինել միայն Մոսկվայի աջակցությանը․
Ռուսաստանը հանդես է գալիս որպես ԽՍՀՄ իրավահաջորդ։ Կարելի է ենթադրել, որ Բաքվի և Աստանայի միջև որոշակի սառնությունը կապված է Հայաստանի երկաթուղիների կառավարումը Ռուսաստանից Ղազախստանին փոխանցելու հարցում Տոկաևի դիրքորոշման հետ։ Աստանան այդ խնդիրը Մոսկվայի հետ քննարկո՞ւմ է կամ պատրաստվո՞ւմ է քննարկել, որևէ տեղեկություն հայտնի չէ։
Ռուսաստանի արտաքին գործերի նախարար Լավրովը Հայաստանի իշխանություններից դժգոհել է, որ երկաթուղիների կոնցեսիոն կառավարման հարցը «հրապարակայնացրել» են։ Այդ թեմայով Մոսկվա-Բաքու քննարկումներ կա՞ն։
Զուլֆուգարովը ասել է, որ Հայաստանը «ձգտում է Նախիջևան-Թուրքիա հաղորդակցությունը իրականացնել իր տարածքով՝ TRIPP-ը դարձնելով Եվրամիության ավելի խոշոր ծրագրի մաս»։
Բաց մի թողեք
Փաշինյանը վերջապես խոստովանեց, որ Ալիևն ամենևին էլ խաղաղության չի ձգտում
Ինչպես Պուտինի սիրելի մարզաձևը վերաբացեց դեպի միջազգային մրցումներ տանող դուռը
Թրամփը կա՛մ «օգտակար հիմար» է, կա՛մ միտումնավոր թուլացնում է Եվրոպան