Հարցը վերաբերում է ոչ միայն մասնավոր բիզնեսին, այլև պետական շահին. Արմեն Սաքապետոյան

Հարգելի՛ գործընկերներ,

Ես գործարար, իրավաբան Արմեն Սաքապետոյանն եմ։ Շարունակելով բարձրաձայնել իմ և ընտանիքիս նկատմամբ բանկային գաղտնիքի ապօրինի արտահոսքի և դրա հիմքով սկսված գործընթացների մասին՝ այս անգամ ներկայացնում եմ այս ապօրինությունների տնտեսական, կործանարար մուլտիպլիկատիվ հետևանքները։

Խոսքը վերաբերում է իմ ընկերությունների կողմից 2020 թվականից հիմնված ավելի քան 600 հեկտար բազմամյա երիտասարդ նուշի այգիներին, որոնք ապօրինի գույքի բռնագանձման վարույթի հետևանքով այսօր կանգնած են չորացման և վերացման իրական սպառնալիքի առաջ։

Հարցը վերաբերում է ոչ միայն մասնավոր բիզնեսին, այլև պետական շահին.

1. Պետության ուղղակի վնասը. Այգիները հիմնվել են պետական աջակցության՝ սուբսիդավորվող վարկերի և ներդրումային ծրագրերի մասնակցությամբ։ Այգիների կորստի դեպքում պետությունը կկորցնի ավելի քան 1.5 միլիարդ դրամի ներդրում և տոկոսադրույք։

2. Օրենքի չգործող մեխանիզմը. Որպեսզի այգիները չոչնչանան, դատարան միջնորդություն եմ ներկայացրել՝ մինչև վարույթի ավարտը այգիների կառավարումը պետությանը հանձնելու համար (մենք միակ ընկերությունն ենք, որ ինքնակամ գնացել է այս քայլին)։

3. Դատախազության անգործությունը. Դատարանը մերժել է միջնորդությունը, քանի որ պարզվել է՝ դատախազությունն արդեն 6 տարի է՝ օրենքով սահմանված գույքի կառավարման այս դրույթի համար պետբյուջեից ոչ մի ֆինանսավորում չի նախատեսում։

Կից տրամադրում եմ տեսանյութը և անհրաժեշտ նյութերը, որտեղ հանգամանալից ներկայացնում եմ այս աբսուրդային իրավիճակը։ «Յերրա»-ի պաշտոնական էջում էլ կարող եք ծանոթանալ այն ծրագրերին, որոնք անժամկետ սառեցվել են։

• Տեսանյութի հղումը – https://we.tl/t-RuH8qBdY1TBdShYv

• «Յերրա»-ի պաշտոնական յութուբյան էջը – https://www.youtube.com/@YerraProject

Պատրաստ եմ պատասխանել ձեր բոլոր հարցերին և տրամադրել համապատասխան փաստաթղթերը։

Հարգանքով՝ Արմեն Սաքապետոյան