ՀՀ կառավարության աջակցությամբ ԿԳՄՍ նախարարությունը մեկնարկում է «Վարչաֆեստ 2026» երիտասարդական ամառային երաժշտական փառատոնը՝ նոր հարթակ, որը միավորում է երիտասարդ երաժիշտներին, ստեղծագործական գաղափարներն ու երաժշտության շուրջ ձևավորվող համայնքը։
Մասնակից երաժշտական խմբերը հնարավորություն կունենան իրենց ստեղծագործությունները և կատարումները ներկայացնելու լայն լսարանին, իսկ լավագույնները կարժանանան մրցանակների՝ 10 միլիոն ՀՀ դրամ ընդհանուր մրցանակային ֆոնդից։
Մրցանակային ֆոնդ
Գլխավոր մրցանակ՝ 4 000 000 ՀՀ դրամ
Առաջին մրցանակ՝ 3 000 000 ՀՀ դրամ
Երկրորդ մրցանակ՝ 2 000 000 ՀՀ դրամ
Երրորդ մրցանակ՝ 1 000 000 ՀՀ դրամ
Մասնակցության հիմնական պայմանները.
Մասնակցության հայտ կարող են ներկայացնել բացառապես երաժշտական խմբերը, որոնց կազմում ընդգրկված ներկայացուցիչները պետք է լինեն 13-35 տարեկան, իսկ խմբի կազմը պետք է ներառի առնվազն 3 անդամ։
Նախընտրական փուլին մասնակցելու համար անհրաժեշտ է ներկայացնել տեսաձայնագրություն՝ այն ուղարկելով varchafest@gov.am էլեկտրոնային հասցեին:
Ելույթները պետք է իրականացվեն բացառապես կենդանի կատարմամբ (Live Performance), իսկ մասնակից խմբերը պետք է հանդես գան վոկալ-գործիքային կազմով։
Ընդունվում են բոլոր երաժշտական ժանրերի հայտերը:
Փառատոնային ծրագիրը պետք է բաղկացած լինի առավելագույնը 3 ստեղծագործությունից՝ 10-12 րոպե ընդհանուր տևողությամբ։
Հայտերը կարող են ներկայացնել նաև օտարերկրյա ներկայացուցիչները։
Մասնակցության հնարավորություն է նախատեսված նաև Հայաստանի Հանրապետությունից դուրս բնակվող և գործունեություն իրականացնող երաժշտական խմբերի համար (մասնակցության հետ կապված ծախսերի փոխհատուցում ծրագրով նախատեսված չէ):
Հայտերի ընդունման ժամկետը՝ 2026 թվականի հուլիսի 1-ից մինչև հուլիսի 20-ը ներառյալ։
Փառատոնի եզրափակիչ փուլը կկայանա 2026 թվականի օգոստոսի 22-ին՝ Սևանա լճի ափին։
Փառատոնի հաղթողները կորոշվեն մասնագիտական ժյուրիի և հանդիսատեսի համատեղ գնահատման արդյունքում՝ 50/50 սկզբունքով, ինչը կապահովի մասնագիտական գնահատականի և հանրային ընտրության հավասարակշռված համադրությունը։
«Վարչաֆեստ 2026»-ը նպատակ ունի դառնալու ոչ միայն երաժշտական մրցույթ, այլև երիտասարդության, մշակույթի և ստեղծարար մտքի զարգացման ամենամյա հարթակ՝ նպաստելով նոր տաղանդների բացահայտմանը, ստեղծագործական համագործակցության ընդլայնմանը, ներքին զբոսաշրջության զարգացմանը և Հայաստանի մշակութային ճանաչելիության բարձրացմանը։
«Միացե՛ք Հայաստանի երիտասարդական երաժշտական ամենասպասված փառատոնին և դարձե՛ք նոր երաժշտական պատմության մասնակից»,- կոչ են անում փառատոնի կազմակերպիչները։
***
Խնդիրը մշակութային կամ սպորտային ծրագրերի կազմակերպումը չէ։ Դրանք անհրաժեշտ են, և երիտասարդներին աջակցելը կարևոր պետական գործառույթ է։ Սակայն պետական միջոցառումներն ու նախաձեռնությունները, որոնք ֆինանսավորվում են հանրային միջոցներով, ցանկալի է ունենան այնպիսի անվանումներ, որոնք ներկայացնում են պետությունը, մշակույթը կամ սպորտը, այլ ոչ թե տվյալ պահին պաշտոն զբաղեցնող անձի շուրջ ձևավորված բրենդը։
Եթե նպատակը երաժշտությունն է, ինչո՞ւ ոչ «Երիտասարդական երաժշտական փառատոն», «Հայ երաժշտության ամառային փառատոն» կամ մեկ այլ չեզոք անվանում։ Ինչո՞ւ է անհրաժեշտ, որ առաջին ասոցիացիան լինի ոչ թե երաժշտությունը, այլ վարչապետը։ Եւ եթե մի օր Նիկոլ Փաշինյանը դառնա նախկին վարչապետ, այդ ժամանակ ի՞նչ է լինելու այս անվանումների հետ։
Գուցե ի հիշատակ Փաշինյանի, կոչվեն «Նախկինաֆեստ», իսկ «Վարչապետի գավաթը»՝ «Նախկին վարչապետի գավա՞թ»։ Թե՞ այդ ժամանակ կհիշեն, որ պետական ծրագրերը պետք է կառուցվեն ինստիտուտների, ոչ թե քաղաքական պաշտոն զբաղեցնող անձանց շուրջ ու կփակեն այս նախագծերը։ 8 տարվա կառավարման ընթացքում Փաշինյանն այդպես էլ չհասկացավ, որ պետությունը մեկ մարդ չէ, պաշտոնն էլ՝ ապրանքանիշ չէ։
Բաց մի թողեք
Հասմիկ Ավագյանն ու Դանիել Դանիելյանն ազատվել են ԿԳՄՍ փոխնախարարի պաշտոններից. Լուսանկարներ
Կառավարությունը հայտնել է, թե ինչու են հեռախոսների IMEI համարների գրանցվելու
Ինչու այդպես էլ չեն արձագանքում Ադրբեջանի հայտարարություններին