Դոնալդ Թրամփը կրկին սպառնացել է Եվրամիությանը առեւտրային մաքսատուրքերով

ԱՄՆ նախագահ Դոնալդ Թրամփը կրկին սպառնացել է Եվրամիությանը առեւտրային մաքսատուրքերով։

«Մեզ հետ շատ, չափազանց վատ են վերաբերվում։ Հետեւաբար, նրանք պետք է պատրաստ լինեն մաքսատուրքերին: Սա արդարության հասնելու միակ ճանապարհն է»,- Deutsche Welle-ի փոխանցմամբ՝ ասել է Թրամփը։

Հանրապետականը դժգոհություն է հայտնել առևտրի դեֆիցիտի կապակցությամբ և նշել, որ Եվրամիությունը հրաժարվում է գնել ամերիկյան մեքենաներ և գյուղմթերքներ։ Ավելի վաղ Թրամփը նաև կոչ էր արել ԵՄ երկրներին ավելացնել ԱՄՆ-ից նավթի և գազի ներկրումը։

Դոնալդ Թրամփը նաև ասել է, որ իր վարչակազմը քննարկում է փետրվարի 1-ից Չինաստանից ներմուծվող ապրանքների վրա 10 տոկոս մաքսատուրքեր սահմանելու հարցը:

Որպես պատճառ նա նշել է ֆենտանիլ սինթետիկ թմրանյութի մաքսանենգությունը Չինաստանից Մեքսիկայի և Կանադայի տարածքով Միացյալ Նահանգներ, որը տարեկան խլում է հազարավոր ամերիկացիների կյանքեր։

Նախագահի պաշտոնում իր առաջին ժամկետում Դոնալդ Թրամփը լրացուցիչ մաքսատուրքեր սահմանեց պողպատի և ալյումինի ներկրման համար, ինչը հանգեցրեց ԱՄՆ-ի և Եվրամիության միջև սուր առևտրային հակամարտության: Ի պատասխան՝ ԵՄ-ն իր հատուկ մաքսատուրքերը սահմանեց մի շարք ամերիկյան ապրանքների, այդ թվում՝ վիսկիի, Harley-Davidson մոտոցիկլետների և Levi Strauss ապրանքանիշով հագուստի վրա։