Ղազախստանի նախագահ Տոկաևը ընդունել է Ռուսաստանի Դաշնության արտաքին գործերի նախարար Լավրովին։ Այդ մասին հայտնել է Ղազախստանի նախագահի աշխատակազմի տեղեկատվության և հանրային կապերի վարչության պաշտոնական կայքը։
Մայիսի վերջին նախատեսված է ՌԴ նախագահ Պուտինի Աստանա պետական այցը, որ, ինչպես Տոկաևն է ասել՝ «ընթացիկ տարվա երկկողմ օրակարգի գլխավոր իրադարձությունը կլինի»։
Ղազախստանի նախագահը Ռուսաստանի հետ հարաբերությունները գնահատել է «ռազմավարական դաշնակցային» և դրանք «զարգացնելու և խորացնելու» պատրաստակամություն հայտնել։
Իր հերթին Լավրովը Տոկաևին տեղեկացրել է Պուտինի «այցի նախապատրաստության մասին» և ընդգծել, որ Ղազախստանի հետ «բազմակողմ համագործակցության բոլոր առանցքային հարցերը մշակվում են կառավարությունների և արտաքին գործերի նախարարությունների մակարդակով»։
Ըստ պաշտոնական հաղորդագրության, զրուցակիցները նաև «տարածաշրջանային և միջազգային օրակարգի հրատապ հարցերի շուրջ մտքերի փոխանակություն են ունեցել»։
Ռուսաստանի արտաքին գործերի նախարարը Աստանա է մեկնել Սանկտ Պետերբուրգում ՌԴ նախագահի և Իրանի արտաքին գործերի նախարարի հանդիպումից, Իսրայելի նախագահի Աստանա այցից և Պուտին-Թրամփ հեռախոսազրույցից հետո։
Իրադարձությունների այս «շղթայով» հատկապես առանձնանում է Իսրայելի նախագահ Հերցոգի Աստանա այցը, որի կարեւորության մասին կարելի է, թերևս, դատել նրանով, որ նա ութ ժամ թռիչքի մեջ է եղել, քանի որ Թուրքիան իսրայելական ինքնաթիռին օդային տարածք չի տրամադրել։
Ղազախստանը մի քանի ամիս առաջ հայտարարել է «Աբրահամյան համաձայնություններին» միանալու մասին։
Դա նշանակում է, որ Աստանան Երուսաղեմի հետ ռազմավարական համագործակցության ուղեգիծ է ընտրում, որ, ամենայն հավանականությամբ, կներառնի նաև անվտանգային և բարձր տեխնոլոգիաների ոլորտը։
Իրանի շուրջ չափազանց բարդ իրավիճակում Իսրայելի նախագահի Աստանա այցը խորհրդանշում է Ղազախստանի ախարհաքաղաքական ընտրության շրջադարձային փոփոխություն, որ Մոսկվային չի կարող չանհանգստացնել։
Ղազախստանը ՀԱՊԿ, այսպես ասած՝ համակարգաստեղծ անդամ է, որի ընտրությունը Կենտրոնական Ասիայի մյուս երկրների համար կարող է ընդօրինակելի դառնալ։ Իսրայելա-ղազախստանյան համագործակցությունը, որքան էլ դիվանագիտական մեղմասացություններով քողարկված, փաստացի ուղղված է Իրանի դեմ, ինչը աշխարհաքաղաքականության դիտանկյունից նաև Ռուսաստանի շահերին է հակասում։
Այս համատեքստում Ռուսաստանի նախագահի Աստանա պետական այցի արդյունավետությունը խնդրահարույց է թվում, թեև մյուս կողմից Ղազախստանը նավթի արտահանման լոգիստիկայով կախված է Մոսկվայից։
Հավանական է, որ կողմերը ֆորմալ կշարունակեն հավատարիմ մնալ ռազմավարական գործընկերային համագործակցությանը, բայց գործնական հարաբերությունները այլևս նախկինը չեն լինի։
Ամենայն հավանականությամբ, Ղազախստանը «մոտենում է Ռուսաստանից ապահարզանի սահմանագծին»։
Բաց մի թողեք
Թեհրանը հասկացրել է, որ պատրաստ է զինված դիմակայության ևս մեկ փուլի
ԻՀՊԿ հրամանատարությունը Արաղչիին կրկին «իդիոտ» կհամարի ու կչեղարկի Պուտինի հետ համաձայնությունները
Պուտին – Թրամփ հեռախոսազրույցը Կրեմլում ավելի շատ հարցերի տեղիք է տվել