Իշխանական բլոգեր Արամ Ավետիսյանի հրահրած սկանդալից հետո` երբ ծամոնի պես կպել էր ձմերուկ վաճառող քաղաքացուն եւ վիրավորում էր նրան` կարծիք հայտնելու համար, տեղեկացանք, որ իրավապահները կատարել են բլոգերի «հանձնարարությունը», ով վեճի ժամանակ սպառնում էր քաղաքացուն բանտ ուղարկել` «ժուժուների կամեռում նստացնել», եւ խուլիգանության հատկանիշներով քրեական վարույթ էին նախաձեռնել:
Վարույթի շրջանակներում ձմերուկ վաճառող երիտասարդը` Արման Քալաշյանը բերման էր ենթարկվել ու ձերբակալվել, ապա՝ ազատ արձակվել։ Թերեւս մեծ հանրային աղմուկից հետո Քննչական կոմիտեն որոշել է քրեական վարույթը «օդում կախված պահել»: Մենք տեղեկացանք, որ այս գործով չկա ոչ մեղադրյալ, ոչ էլ տուժող։
Քալաշյանի պաշտպան Գուրգեն Գրիգորյանը «Հրապարակ»-ի հետ զրույցում ասաց, որ իր պաշտպանյալը կարգավիճակ չունի, ձերբակալությունից հետո հարցաքննվել է եւ ազատ արձակվել․ «Ոչ մի կարգավիճակ չունի այս պահին, ձերբակալությունից հետո հարցաքննվել է եւ վերջ։ Ոչ ոք կարգավիճակ չունի, ես մեղադրանք այստեղ չեմ տեսնում»։ Փաստաբանը ենթադրեց, որ ամենայն հավանականությամբ, իշխանական բլոգերն էլ հարցաքննված կլինի, բայց թե ինչ է ասել, ինչպես է ներկայացրել իրավիճակը, տեղյակ չէ։ Ի դեպ, ներկայացնելու կարիք էլ չկա, քանի որ ամեն ինչ տեսագրված է եւ տեսանյութում հստակ երեւում են եւ Քալաշյանի, եւ սադրիչ բլոգերի գործողություններն ու խոսքերը:
Գրիգորյան նշեց նաեւ՝ Արման Քալաշյանը շարունակում է իր առօրյայով զբաղվել, նրա վրա ճնշում չկա․ «Բա ի՞նչ անի, էդ էրեխեքին ո՞վ պահի։ Չեմ կարծում՝ ինքը ճնշվող տղա է»։
Բաց մի թողեք
Ովքե՞ր ՔՊ-ից կողմ քվեարկեցին Արամ Վարդևանյանին
Իշխանությունն ու ընդդիմությունը հանձնաժողովներ ընտրեցին. ով որ հանձնաժողովը ընտրեց
Ադրբեջանական պետական հեռուստալիքի մակարդակով հերքել են ՔՊ պատգամավորուհուն