18/11/2026

EU – Armenia

Ինչ է սպասվում, երբ Փաշինյանը փորձի պարտադրել ընդդիմությանը

ԱԺ «Ուժեղ Հայաստան» խմբակցության ղեկավար Նարեկ Կարապետյանը կարծում է, որ Հայաստանի Սահմանադրության հիմքում Անկախության հռչակագիրն է՝ իր քաղաքական և պատմական բովանդակությամբ, ինչպես նաև պետության ժողովրդավարական բնույթի ու զարգացման ուղղության վերաբերյալ ուղերձներով։

ԱԺ-ում լրագրողների հետ զրույցում նա հայտարարել է, որ երկրի ինքնիշխանությանը սպառնացող առավել լուրջ վտանգներից մեկը Սահմանադրության հիմնարար դրույթների փոփոխությունն է՝ արտաքին հակառակորդի անմիջական պահանջով։

Կարապետյանի խոսքով՝ քաղաքացիների զգալի մասը բավարար տեղեկացված չէ Սահմանադրական փոփոխությունների գործընթացի վերաբերյալ։ Նրա գնահատմամբ՝ յուրաքանչյուր երրորդ քաղաքացին խորքային պատկերացում չունի նախատեսվող փոփոխությունների մասին։

Ընդդիմադիր գործիչը կարևորել է նաև հանրային իրազեկումը՝ նշելով, որ հասարակությանը պատշաճ կերպով չի բացատրվել, թե ինչի շուրջ է իրականում պայքարը և ինչ նշանակություն ունի այն։ Այս համատեքստում նա անդրադարձել է նաև Սամվել Կարապետյանի կալանավորմանը՝ հարց բարձրացնելով, թե ինչու է գործարարն այսօր անազատության մեջ, եթե քննարկվող հարցն այդքան կարևոր չլիներ։

Անդրադառնալով հնարավոր իրավիճակին, երբ Նիկոլ Փաշինյանը հանրային ճնշման միջոցով փորձի ընդդիմադիր պատգամավորներին պարտադրել կողմ քվեարկել սահմանադրական փոփոխություններին՝ Կարապետյանը նշել է, որ նման գործողությունները կարող են որակվել որպես սահմանադրական կարգի տապալում և առաջացնել քրեական պատասխանատվություն։

Նա ընդգծել է, որ իշխանության ձևավորման և Սահմանադրության հիմքում ժողովուրդն է, ուստի քաղաքացիների կամքին հակառակ որևէ որոշում պարտադրելու փորձի դեպքում հասարակությունը պետք է արտահայտի իր դիրքորոշումն ու ընդդիմանա դրան։