Ռուսաստանի արտգործնախարար Լավրովը Բելառուսի իր գործընկերոջ հետ հանդիպումից հետո հայտարարեց, որ ԲՐԻԿՍ երկրները կայացրել են նոր անդամների հարցում դադար վերցնելու որոշում:
Օրերս արված այս հայտարարությունը դուրս է մնացել մեծ ուշադրությունից, սակայն սա բավականին էական երանգներ պարունակող հայտարարություն է: Բանն այն է, որ ԲՐԻԿՍ անդամության հարցում հավանություն ստանալու ակնկալիք հայտնել էր Թուրքիան:
Այդ երկրի արտաքին գործերի նախարարը Ռուսաստանի Կազան քաղաքում ԲՐԻԿՍ արտգործնախարարների հավաքից առաջ հայտարարել էր, որ Անկարան ակնկալում է 2024 թվականին ստանալ իր անդամության հավանություն: Անկարայի ակնկալիքը թերեւս կապված էր աշնանը Ռուսաստանում սպասվող ԲՐԻԿՍ վեհաժողովից առաջ արտգործնախարարների մակարդակում հավանություն ստանալու հետ:
Բայց, ահա Լավրովը հայտարարում է, որ 2024 թվականին ԲՐԻԿՍ անդամություն է ստացել 5 նոր պետություն եւ կազմակերպության անդամների տասնյակը որոշել է դադար վերցնել նոր անդամների հարցում, որպեսզի «մարսի» արդեն իսկ անդամակցած հնգյակին: Ինչպես հայտնի է, ԲՐԻԿՍ անդամ են Բրազիլիան, Հնդկաստանը, Չինաստանը, Ռուսաստանը եւ Հարավաֆրիկյան հանրապետությունը: 2024 թվականի հունվարից կազմակերպության լիիարվ անդամ դարձան Իրանը, Եթովպիան, Եգիպտոսը, Արաբական Միացյալ Էմիրությունները:
Անդամության համաձայնություն ստացել է նաեւ Սաուդյան Արաբիան, սակայն թագավորությունը դեռեւս չի անդամակցել ԲՐԻԿՍ-ին: Այդպիսով, պարզ է դառնում, որ Թուրքիայի անդամության ակնկալիքը մերժել են: Ռուսաստանից բացի է՞լ ինչ երկրներ են դեմ եղել Թուրքիայի անդամությանը, պարզ չէ, սակայն անկասկած է թերեւս, որ Ռուսաստանն էլ այդ գաղափարով ոգեւորված չէ, ինչի մասին է վկայում ընդհանուր առմամբ Թուրքիայի հետ հարաբերության նկատելի սառնությունը:
Միեւնույն ժամանակ, ըստ ամենայնի ԲՐԻԿՍ երկրները բոլրովին դեմ էլ չեն եղել Ռուսաստանի այդ դիրքորոշմանը, այլապես Մոսկվան հազիվ թե այդ հարցում գնար մյուս երկրների կարծիքին ու գնահատականին հակադիր ճանապարհով: Ի վերջո, Թուրքիայի անդամության հարցում մեծ քարը թերեւս նաեւ ԱՄՆ դիրքորոշումն է, որի պետքարտուղարի տեղակալն օրինակ պարզ հայտարարում է, որ մտադիր են Կենտրոնական Ասիայից Ադրբեջան-Հայաստան-Թուրքիա առեւտրային միջանցք կառուցել դեպի միջերկրծովյան ռեգիոն, որպեսզի թուլացնեն Ռուսաստանի, Չինաստանի եւ Իրանի դիրքերը: ՄԻնչդեռ, այդ միջանցքով մեղմ ասած ոգեւորված չի լինի նաեւ Հնդկաստանը: Այդ պարագայում Թուրքիային ԲՐԻԿՍ կընդունեն թերեւս մի պայմանով՝ եթե Անկարան հրաժարվի ամերիկյան պատկերացմամբ երթուղու մասնակցությունից:
Բաց մի թողեք
Հայ գործարարների բաց նամակը Նիկոլ Փաշինյանին․ Ով դու, առաջնորդներից մեծագույնը, առաջնորդների առաջնորդը, խաղաղության խաչասերում ․․․
Եվրոպական առաջնորդները առաջընթաց են գրանցել Ուկրաինայի հակամարտության կարգավորման հարցում
Ադրբեջանը զինադադարի պայմանավորվածությունը չի կատարում, իսկ Հայաստանը դրա դեմ «ոչինչ չի ձեռնարկում»