Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր, Մալթայի ֆիլհարմոնիկ նվագախմբի գլխավոր դիրիժոր և ընթացիկ համերգաշրջանում Բեռլինի սիմֆոնիկ նվագախմբի գլխավոր հրավիրյալ դիրիժոր Սերգեյ Սմբատյանը հոկտեմբերի 24-ին և 26-ին ելույթ կունենա Սերբիայում անցկացվող «Bemus» և «Nomus» երաժշտական փառատոների շրջանակներում։
Մաեստրո Սմբատյանը կղեկավարի Վոյվոդինայի սիմֆոնիկ նվագախումբը։
Համերգները կազմակերպվել են Բելգրադի փառատոների կենտրոնի և «Almazian Productions» ընկերության կողմից և անցկացվում են Սերբիայում Հայաստանի դեսպանության բարձր հովանու ներքո։
Համերգային երեկոների ընթացքում կհնչեն Սերգեյ Ռախմանինովի Դաշնամուրի թիվ 3 կոնցերտը և Դմիտրի Շոստակովիչի 10-րդ սիմֆոնիան։
Դասական երաժշտության այս գլուխգործոցները կներկայացվեն դիրիժոր Սերգեյ Սմբատյանի մեկնաբանմամբ։ Նա աշխարհում հայտնի է որպես տարբեր կրթական և բարեգործական նախագծերի միջոցով դասական երաժշտությունը հանրահռչակող արտիստ, ում առանձնահատուկ ձեռնարկումներից են Ջոն Մալկովիչի հետ կյանքի կոչված նախագծերը, ինչպես նաև աշխարհահռչակ կոմպոզիտորներ Քշիշտոֆ Պենդերեցկու, Տիգրան Մանսուրյանի, Արվո Պյարտի, Գիա Կանչելիի և այլ հեղինակների հետ համագործակցությունը։
Նա ղեկավարել է Լոնդոնի սիմֆոնիկ նվագախումբը, Վարշավայի, Դրեզդենի, Իսրայելի ֆիլհարմոնիկ նվագախմբերը, Պրահայի ռադիոյի սիմֆոնիկ, Մարիինյան թատրոնի ու բազմաթիվ այլ նվագախմբեր։
Սերբիայում կայանալիք համերգներին որպես մենակատար հանդես կգա երիտասարդ հայազգի դաշնակահար Եվա Գևորգյանը։ 20-ամյա Եվա Գևորգյանը տպավորիչ երաժշտական կենսագրություն ունի։ Նա հանդես է եկել շուրջ 70 դիրիժորների ղեկավարմամբ, որոնց թվում են այնպիսի մեծանուն վարպետներ, ինչպիսիք են Գերգիևը, Պետրենկոն, Սպիվակովը, Սլադկովսկին, Մարիոտտին, Ցիմերմանը, Յուրոսվկին և այլք։ Նա մի քանի տասնյակ միջազգային մրցույթների մրցանակակիր է։ Երաժշտական քննադատներն ընդգծում են նրա զգացմունքային արտահայտչականությունն ու անթերի կատարողական տեխնիկան։
Նշենք, որ Բելգրադում անցկացվող «Bemus» փառատոնը հիմնադրվել է 1969 թվականին։ Այն Սերբիայի և Հարավարևելյան Եվրոպայի ամենահին պատմությունն ունեցող և ամենահեղինակավոր փառատոներից է։ «Bemus»-ի շնորհիվ վերջին տասնամյակում Բելգրադում հյուրընկալվել են աշխարհում մեծ ճանաչում վայելող նվագախմբեր ու մենակատարներ՝ Նյու Յորքի ֆիլհարմոնիկ նվագախումբը, Կոնցերտգեբաու նվագախումբը, Մյունխենի ֆիլհարմոնիկ նվագախումբը, Զուբին Մեթան, Միշա Մայսկին, Մաքսիմ Վենգերովը և աշխարհահռչակ այլ արտիստներ ու կոլեկտիվներ։ «Bemus»-ը մեծ հարթակ է նաև երիտասարդ երաժիշտների, նրանց մասնագիտական առաջխաղացման համար։
Երաժշտական աշխարհում մեծ ճանաչում է վայելում նաև «Nomus» փառատոնը, որն այս տարի անցկացվում է 49-րդ անգամ։ Այն նույնպես իր տանիքի ներքո համախմբում է աշխարհի լավագույն արտիստներին՝ ունկնդրին պարգևելով դասական երաժշտության բարձրակարգ համերգներ։
Բաց մի թողեք
Երգեհոնային արվեստը շարունակում է ներկայանալ նոր համերգային իրադարձություններով
Ալեքսանդր Սպենդիարյան․ Կոմպոզիտորի կյանքի ճանապարհը, երաժշտություն, որ դարձավ ազգային ինքնության ձայնը
Վարպետաց դասեր թավշյա հեղափոխականներին․ Շուկայում ի՞նչ արժե կարտոֆիլը, կամ՝ ինչպես Հովհ. Շիրազը «ուշունցակապ» արեց Հրաչյա Քոչարին