ՌԴ ԱԳՆ խոսնակ Մարիա Զախարովան հայտարարել է, որ ճանապարհների ապաշրջափակման հարցում Մոսկվայի և Թեհրանի դիրքորոշումները նույնական են, և միակ տարբերությունը, ըստ նրա, այն է, որ Ռուսաստանը այդ հարցով եռակողմ աշխատանքային խմբի անդամ է:
Զախարովան նկատի ունի 2021 թվականի հունվարի 11-ին Մոսկվայում Պուտին-Փաշինյան-Ալիև հանդիպմանը ստեղծված աշխատանքային խումբը, որը պետք է զբաղվեր նոյեմբերի 9-ի եռակողմ հայտարարության հիման վրա դեբլոկադայի հարցերով:
Իհարկե, Զախարովան հայտարարել է, որ եռակողմ այդ ձևաչափը չի գործում, ըստ նրա՝ Երևանի դիրքորոշման պատճառով:
Մյուս կողմից, սակայն, Երևանը այդպես էլ չի հայտարարում նոյեմբերի 9-ի փաստաթղթի և, հետևաբար 9-րդ կետի չեղարկման մասին, ստորագրությունը ոչ ևս համարելու մասին: Հայաստանը հայտարարում է, որ Ադրբեջանին արել է առաջարկ և սպասում է պատասխանի՝ ավելացնելով, որ այդ առաջարկը բավարարում է թե՛ Հայաստանի, թե՛ Ադրբեջանի մոտեցումները:
Սակայն Ադրբեջանն օրերս հայտարարություն էր արել Նիկոլ Փաշինյանի հոդվածի առիթով, նշելով, որ Երևանի առաջարկները չունեն «գործնական նշանակություն»:
Այլ կերպ ասած՝ դա մերժում է: Փետրվարի 14-ին տեսակապի միջոցով շփվել են սահմանազատման ու սահմանագծման հարցերով Հայաստանի և Ադրբեջանի փոխվարչապետներ Գրիգորյանն ու Մուստաֆաևը, որոնք քննարկել են սահմանազատման գործընթացի ուղեցույցների, նաև առկա հանդիպման կազմակերպման հարցեր:
Գրիգորյանն ու Մուստաֆաևը այն եռակողմ աշխատանքային խմբի համանախագահ են, որի մասին խոսել էր Զախարովան: Երկկողմ շփմանը նրանք քննարկե՞լ են դեբլոկադայի հարցեր: Համենայն դեպս կլինի տարօրինակ քննարկման բացակայությունը: Եռակողմ շփման բացակայությունը կլինի հասկանալի, իսկ ահա երկկողմ քննարկումների բացակայությունը կլինի տարօրինակ, եթե Երևանը խոսում է առաջարկների մասին:
Հետևաբար, մեծ է հավանականությունը, որ սահմանազատման ու սահմանագծման հարցերը առիթ են նաև ճանապարհների վերաբերյալ մտքեր փոխանակելու համար: Արդյո՞ք այդ առնչությամբ որոշակի «սպասումներն» էին պատճառը, որ օրերս թեմային բավականին հստակ ու հանգամանալից անդրադարձեր կատարեց Հայաստանում Իրանի դեսպան Սոբհանին:
Ի դեպ, Սոբհանին նախօրեին հյուրընկալվել է Հայաստանի առաջին նախագահ Տեր-Պետրոսյանին, որը դեսպանի հետ ավելի քան մեկուկես ժամ տևած հանդիպման առնչությամբ տվել է, ըստ էության, իրեն ոչ այնքան բնորոշ գունեղ գնահատական՝ «հիացմունք» դեսպանի վերջին ասուլիսի առնչությամբ:
Եթե Տեր-Պետրոսյանը դեսպանի հետ հանդիպման առնչությամբ կիրառում է այդօրինակ պերճախոսություն, ապա դա թերևս կնշանակի, որ հնչել են կարևորագույն մեսիջներ թե՛ պահի, թե՛ բովանդակության իմաստով:
Բաց մի թողեք
Չափազանց պարզ է. Փաշինյանի այդ քայլը պայմանավորված է Ադրբեջանի հայտնի պահանջով
Հայաստանն ու դրա տարաբնույթ մարտահրավերները՝ ընթացիկից մինչև էքզիստենցիալ՝ հարատև
Հրաժարվում եմ այս ֆարսին մասնակցել, դիմում եմ աշխարհի առաջնորդներին. Ռուբեն Վարդանյանը հացադուլ է հայտարարել