Վաղարշապատում մեկնարկել են ավագանու ընտրությունները

Վաղարշապատ խոշորացված համայնքում համամասնական ընտրակարգով ավագանու ընտրություններն անցկացնելու համար կազմավորվել են 47 տեղամասեր:

Առավոտյան ժամը 8.00-ին, ՀՀ ընտրական օրենսգրքով սահմանված կարգով բացվել են ընտրությունների համար ձևավորված բոլոր 47 ընտրական տեղամասերը և ընդունել առաջին ընտրողներին: Ընտրողների էլեկտրոնային գրանցման նպատակով օգտագործվում է 117 տեխնիկական սարքավորում:

Ընտրությունների և քվեարկության վերաբերյալ լուսաբանում իրականացնելու համար հավատարմագրվել են 31 տեղական զանգվածային լրատվության միջոցներ (209 ներկայացուցիչ):

Ընտրությունները դիտարկելու նպատակով հավատարմագրվել է 6 դիտորդական առաքելություն, որից երկուսը՝ համատեղ (233 ներկայացուցիչ)։

Վաղարշապատ համայնքի ընտրողների թիվը, ըստ Ներքին գործերի նախարարության միգրացիայի և քաղաքացիության ծառայության տվյալների, 69866 է։

Ընտրությունների քվեարկության մասնակիցների թիվը, ժամը 12.00-ից սկսած երեքժամյա պարբերականությամբ, կհրապարակվի Կենտրոնական ընտրական հանձնաժողովի համացանցային կայքում՝ www.elections.am։

Այսօր Վաղարշապատում մեկնարկում են ՏԻՄ ընտրությունները։

Բոլոր ընտրատեղամասերը կբացվեն 08։00-ին։

Մասնակցում է 8 քաղաքական ուժ.

– «Հայրենիք» կուսակցություն

– «Հաղթանակ» կուսակցությունների դաշինք

– «Մայր Հայաստան» ազգային-դեմոկրատական կուսակցություն

– «Ժառանգություն» կուսակցություն

– «Համահայկական ճակատ» կուսակցություն

– «Քաղաքացիական պայմանագիր» կուսակցություն

– «Ազատ դեմոկրատներ» կուսակցություն

– «Հանրապետություն» կուսակցություն

Բացվել են բոլոր 47 ընտրատեղամասերը։ Ընտրողների թիվը 70,022 է:

ՀՀ կենտրոնական ընտրական հանձնաժողովը 10 ժամ տևած նիստում քննարկել և որոշել է «Հայաքվե», «Իրավունքի և արդարության կենտրոն Թաթոյան» հիմնադրամ և «Պառլամենտարիզմի զարգացման միջազգային կենտրոն» դիտորդական առաքելություններին չզրկել դիտորդության իրավունքից։