Մեկ տարի առաջ՝ 2025 թվականի սեպտեմբերի 23-ի ուշ երեկոյան, Մերձավանում հնչած կրակոցները ցնցեցին Փարաքարը։
Իր տան մոտ սպանվեց համայնքի ղեկավար Վալոդյա Գրիգորյանը։ Կրակոցների հետևանքով սպանվեց նաև նրա ընկերը՝ ՆԳՆ քրեական ոստիկանության ծառայող Կարեն Աբրահամյանը, իսկ նրանց հետ գտնվող Արծրուն Գալստյանը վիրավորվեց։
Դեպքը տեղի էր ունեցել ժամը 23։52-ի սահմաններում՝ Մերձավանի Երևանյան խճուղում։ Քննության ընթացքում դեպքի վայրում հայտնաբերվել էին տեսախցիկների տեսագրություններ, արնանման հետքեր և այլ իրեղեն ապացույցներ, առաջ էին քաշվել մի քանի վարկածներ։
Գրիգորյանը համայնքի ղեկավար էր ընտրվել 2025 թվականի մարտի 30-ի արտահերթ ՏԻՄ ընտրությունների արդյունքում՝ «Միասնություն» դաշինքի ցուցակով։ Պաշտոնը հասցրեց զբաղեցնել ընդամենը մի քանի ամիս։
«Ընտրվելուց առաջ նա ներկայացրել էր համայնքի զարգացման լայն ծրագիր՝ խոստանալով անվճար դարձնել մանկապարտեզների սպասարկումը, բարեկարգել փողոցները, լուծել լուսավորության, խմելու և ոռոգման ջրի խնդիրները, վերանորոգել մանկապարտեզներն ու մշակութային և սպորտային կառույցները։ Ընտրվելուց հետո խոստումները հերթականությամբ կատարում էր»,- MediaHub-ին ասաց համայնքի բնակիչ Արթուր Հարությունյանը։
Նրա խոսքով՝ համայնքում Վալոդյային սիրում էին մեծից փոքր։ Դաժան սպանությունից հետո մշակույթի տանն ու դպրոցներում կազմակերպվել են հիշատակի միջոցառումներ, իսկ մարզիկներն ու աշակերտները տարբեր մրցույթներում իրենց հաղթանակները նվիրել են համայնքապետի հիշատակին։
«Վալոդյային ճանաչողները գիտեն՝ նա շատ բարի ու համեստ մարդ էր։ Երբեք իրեն վերևից չէր պահում։ Կարող էր ժամերով լսել մարդու խնդիրը, նույնիսկ եթե այդ պահին լուծելու հնարավորություն չուներ։ Շփումներում պարզ էր ու միշտ օգնության հասնելու պատրաստակամություն ուներ։ Շատերը հենց դրա համար էին նրան սիրում»,- ասաց Փարաքարի բնակիչը։
Վալոդյա Գրիգորյանի և Կարեն Աբրահամյանի սպանության գործով նախաքննությունն ավարտվել է 2026 թվականի հունվարին։ Քրեական հետապնդում է իրականացվում Գևորգ Հարությունյանի և Նարեկ Օհանյանի նկատմամբ։ Հարությունյանին մեղադրանք է առաջադրվել երկու սպանության, Արծրուն Գալստյանի սպանության փորձի և ապօրինի զենք-զինամթերքի շրջանառության, իսկ Օհանյանին՝ սպանություններին և սպանության փորձին օժանդակելու համար։
Գործն այժմ դատարանում է։ 2026 թվականի մարտի 10-ի նիստում երկու մեղադրյալներն էլ չեն ընդունել իրենց առաջադրված մեղադրանքները։ Դատարանը գործը քննում է, իսկ մեղադրանքները դեռևս պետք է ապացուցվեն։ Մեղադրյալների նկատմամբ գործում է անմեղության կանխավարկածը՝ մինչև օրինական ուժի մեջ մտած դատավճիռը։
Փարաքարի համար, սակայն, սեպտեմբերի 23-ը շարունակում է մնալ համայնքի ղեկավարի, ընկերոջ և ընտանիքի հոր կորստի օրը։ Մեկ տարի անց նրա անունը համայնքում շարունակում են հիշել՝ պահպանելով նրան ճանաչողների հիշողություններն ու մարդկային կերպարը։
Բաց մի թողեք
Գանձասարի վերջին դրվագը ևս մեկ անգամ ցույց տվեց Մատենադարանի նման հաստատությունների արժեքը
«Մանկական Եվրատեսիլ»-ում Հայաստանը կներկայացնի Վահան Քերոբյանի դուստրը. Լուսանկար
Արոնյանը չի խաղա Հայաստանի հավաքականի դեմ