Ապրիլի 12-ի գիշերը անհայտ անձինք հրկիզել են Ֆրեզնոյի (Կալիֆոռնիա, ԱՄՆ) «Արարատ» հայկական գերեզմանատունը, հայտնում է Zartonk-ը։ «Ուրբաթ գիշերը գերեզմանատան գլխավոր մուտքի մոտ հրկիզվել է ութ ծառ: Այս մասին օպերատիվ կերպով տեղեկացվել են ոստիկանությունը և հրշեջ ծառայությունը»,- նշում է պարբերականը։ Մինչ այժմ ոչ ոք չի ձերբակալվել հրկիզումը կատարելու կասկածանքով։
Ինչպես հաղորդվում է, հունվարից ի վեր սա արդեն վեցերորդ հրկիզումն է գերեզմանատանը, որը հիմնադրվել է 1885 թվականին։ Միջադեպերի հետևանքով այրվել է ընդհանուր առմամբ 19 նոճի։ Վարչակազմը մտահոգված է միջադեպերով, քանի որ դրանք համարում է նպատակաուղղված հարձակումներ։ Նրանք հիշեցրել են, որ այս գերեզմանատանը թաղված են բազմաթիվ հայ ականավոր գործիչներ, այդ թվում՝ Սողոմոն Թեհլիրյանը, Վիլյամ Սարոյանը, Վիկտոր Մաղաքյանը և այլք։
Վարչակազմը չի բացառել, որ հրկիզումը կապված է Հայոց ցեղասպանության զոհերի հիշատակի առաջիկա օրվա հետ, որը նշվում է ամեն տարի ապրիլի 24-ին։ Նախնական տվյալներով՝ ծառերի փոխարինումը կարժենա մոտավորապես $25 հազար։ Վարչակազմը վստահ չէ, որ ապահովագրությունը կծածկի ծախսերը:
Բաց մի թողեք
Թուրքիան՝ օկուպացված Շուշիում, բացել է երկրաշարժի մոնիթորինգի կայան
Ադրբեջանի ՊՆ սպառնացել է Հայաստանին
Մերձավանում «Մեգաշին» ՍՊԸ-ն աշխատել է խախտումներով, գործունեությունը կասեցվել է. ում անունն է կապվում դրա հետ