25/07/2024

Ծնողները շատ դժգոհ են, Եղիշե Հակոբյանի ցուցմունքում նոր հանգամանքներ են առաջ քաշվել

Ազատ գյուղի զինվորական կացարանի հրդեհի գործով դատական հաջորդ նիստը տեղի կունենա հունիսի 28-ին։

«Արդեն տուժողների (ծնողների, խմբ․) ցուցմունքներն են հրապարակվում»,- MediaHub-ի հետ զրույցում ասաց զորամասի հրդեհի հետևանքով մահացած զինծառայողների հարազատների ներկայացուցիչ Նորայր Նորիկյանը։

Նրա խոսքով՝ դատական նախորդ նիստերի ընթացքում հիմնական մեղադրյալ Եղիշե Հակոբյանն է երկու անգամ ցուցմունք տվել։

Հիշեցնենք, որ ըստ քրեական վարույթի նյութերի` Հակոբյանն է վառել վառարանը, որից էլ բռնկվել է կացարանի հրդեհը։

«Ամեն դեպքում, ծնողները շատ դժգոհ են թե՛ դատաքննությունից, թե՛ անջատված մասի քննությունից։ Ոչ մի բան չի փոխվել»,- նշեց Նորիկյանը։

Փաստաբանը տեղեկացրեց, որ եթե մինչ այս պահը Եղիշե Հակոբյանը նշում էր, որ միայն ինքն է վառել վառարանը, այդ պահին միայն ինքն է եղել կացարանի այդ հատվածում, վերջին երկու նիստերի ընթացքում իր տված ցուցմունքի բովանդակությունից պարզվում է, որ իր հետ եղել են երկու զինծառայողներ, մասնավորապես, տուժող ճանաչված Լևոն Խառատյանը և օրվա հերթապահը՝ Ռադիկը։

«Հերթապահին արդեն մեղադրանք է առաջադրված՝ անջատված մասով քննվող քրեական վարույթի շրջանակներում։ Գիտենք, որ այս գործով անջատված մաս կա, որն այս պահին քննվում է։ Հիմա այս գործով հերթապահին մեղադրանք է առաջադրված»,- ասաց Նորիկյանը։

Հիշեցնենք, որ 2023 թվականի հունվարի 19-ին, ժամը 01:30-ի սահմաններում Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում բռնկված հրդեհի հետևանքով զոհվել է 15 ժամկետային զինծառայող, 7 զինծառայող տեղափոխվել է Վարդենիսի հոսպիտալ, նրանից 4-ը բուժօգնություն ստանալուց հետո դուրս է գրվել, 3-ը՝ ծանր վնասվածքներով տեղափոխվել Երևան՝ Այրվածքաբանության ազգային կենտրոն: