Այն ժամանակահատվածում, երբ Պուտինը Բաքվում բանակցում էր Ալիեւի հետ, Մոսկվայում ՌԴ փոխարտգործնախարար Գալուզինը հանդիպում է ունեցել Թուրքիայի դեսպանի հետ, դեսպանի խնդրանքով:
Ինչպես այդ հանդիպման մասին տեղեկացրել է ՌԴ ԱԳՆ-ն, Գալուզինը Թուրքիայի դեսպանի հետ քննարկել է ուկրաինական թեման եւ կոչ է արել Անկարային «հրաժարվել հավաքական Արեւմուտքի ապակառուցողական քաղաքականությանը մասնակցելուց», սպառազինություն չմատակարարել Ուկրաինա:
Անշուշտ բավականին ուշագրավ կոնտրաստ է՝ Բաքվում Ալիեւի հետ Պուտինի ջերմ հանդիպումն ու գրեթե ծնկաչոք խոնարհումը Հեյդար Ալիեւի հուշարձանին, իսկ Մոսկվայում փոխարտգործնախարարի հորդորը Թուրքիային՝ չլինել ապակառուցողական եւ չմասնակցել արեւմտյան քաղաքականությանը:
Այս կոնտրաստը լավագույնս բացատրում է հեռախոսազանգը, որ Պուտինի այցից առաջ Էրդողանը ունեցել էր Ալիեւի հետ: Էրդողանն էլ ըստ ամենայնի Ալիեւին է հորդորել «չմասնակցել Ռուսաստանի քաղաքականությանը»:
Ռուսաստանը նկատելիորեն փորձում է բաժանել Ադրբեջանին ու Թուրքիային, միայն այդ կերպ դիտարկելով իր կովկասյան կենսունակության հնարավորությունը: Ըստ էության, այստեղ է ռուս-ադրբեջանական այն դաշնակցության «մեխը», որի մասին թուղթը Պուտինն ու Ալիեւը ստորագրել են 2022 թվականի փետրվարին՝ Ուկրաինայի վրա ՌԴ գրոհից երկու օր առաջ: Բնականաբար, խոսքն այն մասին չէ, որ Ադրբեջանն ու Թուրքիան դադարելու են կապված լինել Շուշիի հռչակագրով եւ այլ փաստաթղթերով:
Բայց, փաստաթղթերը, հռչակագրերը կենսունակ եւ գործուն են, եթե ապահովվում են տնտեսա-քաղաքական եւ ռազմա-քաղաքական կոմունիկացիոն հնարավորություններով, ուղեկցվելով ընդհանուր հետաքրքրություններով եւ շահերով: Ռուսաստանը փորձում է ձեւավորել Ադրբեջանի շահերի այլ միջավայր, որտեղ կլինի հնարավորինս նվազ Թուրքիա:
Սա իհարկե բարդ խնդիր է Մոսկվայի համար: Ավելին, սա նույնիսկ առավել բարդ խնդիր է, քան պատերազմն Ուկրաինայում: Բայց, այդ խնդիրը Ռուսաստանի համար պակաս կարեւոր չէ, եթե չասենք՝ առավել կարեւոր, առանց որի արդյունավետ լուծման, Մոսկվան ռազմավարական քիչ խնդիրներ կլուծի անգամ Ուկրաինայում աներկբա հաղթանակի պարագայում:
Բաց մի թողեք
Էքզիթ-փոլեր. Գերմանիայի ծայրահեղ աջ AfD-ն հստակ առաջատար է Սաքսոնիա-Անհալթի ընտրություններում
«Հակարիի կամրջի մոտ ադրբեջանցիներն ուզում են առաջանալ, հայ սահմանապահները չեն թողնում․ կրակոցներ չկան, միայն լեզվակռիվ է»․ Կոռնիձորի վարչական ղեկավար
Տասնյակ հազարավոր խորվաթներ բողոքի ցույց են անցկացնում վտանգավոր թափոնների աղբավայրի դեմ. Լուսանկար