Դուրովը «կապված է Ռուսաստանի եւ Ադրբեջանի հատուկ ծառայությունների հետ»

Ֆրանսիայի ոստիկանությունը ձերբակալել է Telegram-ի հիմնադիր, միլիարդատեր Պավել Դուրովին: Դուրովը դեռեւս դպրոցական տարիներին զբաղվել է համակարգչային ծրագրավորմամբ եւ եղբոր հետ ստեղծել Facebook-ի ռուսաստանյան նմանակ В Контакте սոցիալական ցանցը: Նրա կարողությունը գնահատվում է 15 միլիարդ դոլար:

Ըստ աղբյուրների, Դուրովը Ֆրանսիայի քաղաքացիություն ունի: Նրան նկատմամբ քրեական հետապնդում է հարուցվել Telegram-ի եւ հանցավոր խմբավորումների ու օտարերկրյա հատուկ ծառայությունների միջեւ կապի կասկածանքով:

Դուրովի ձերբակալության ժամեր անց Ռուսաստանի փոխխոսնակ Վյաչեսլավ Դավանկովը դիմել է արտգործնախարար Լավրովին եւ հորդորել, որպեսզի «բոլոր միջոցները ձեռնարկել Դուրովին Արաբական միացյալ էմիրություններ կամ Ռուսաստան տեղափոխելու ուղղությամբ, եթե ֆրանսիական իշխանությունները նրան ազատ չարձակեն»: Դավանովը Դուրովի ձերբակալությունը որակել է «քաղաքական»: Նրա համոզմամբ՝ նպատակն է «մուտք ունենալ Telegram-օգտատերի անձնական տեղեկությունների տիրույթ»:

Խնդրին ինտրիգ է հաղորդում փաստը, որ Պավել Դուրովը օգոստոսի 24-ին անձնական ինքնաթիռով Փարիզ է մեկնել Բաքվից: Բաքվի իշխանական լրատվամիջոցի բարկածով՝ նա հրավիրվել է «որպես DREAM FEST 2024 միջազգային փառատոնի պատվավոր հյուր եւ ապրել է Sea Breeze առողջարանում՝ ընկերուհու հետ»:

Վարկածը, որ նա մերձկասպյան առողջարանում «հանգստացել է», ծիծաղելի է թվացել: Բանն այն է, որ Պուտինի Բաքու այցի նախօրեին տեղեկություն է հայտնվել, որ «նախապատրաստվում է նրա հանդիպումը ռուսաստանցի միլիարդատեր, Telegram-ի հիմնադիր Պավել Դուրովի հետ»: Կրեմլը, սակայն, այդ տեղեկությունը հերքել է՝ ասելով, որ «նման առաջարկ եղել է, բայց նախագահ Պուտինը չի համաձայնել»:

Ըստ երեւույթին, Դուրովը «կապված է Ռուսաստանի եւ Ադրբեջանի հատուկ ծառայությունների հետ»: Նա, հավանաբար, հույս է ունեցել կամ ադրբեջանական կողմը վստահեցրել է, որ Բաքվում կարժանանա Պուտինի ընդունելությանը եւ կկարողանա Ադրբեջանից մեկնել Ռուսաստան՝ խուսափելով ֆրանսիական արդարադատությունից:

Telegram-ի եւ հանցավոր խմբավորումների ու տարբեր երկրների հատուկ ծառայությունների կապերն, ամենայն հավանականությամբ, այնքան խորը եւ սկանդալային են, որ Ռուսաստանի նախագահը Դուրովին իրավական պաշտպանության տակ առնելու քայլից ձեռնպահ է մնացել:

Իսկ թե ինչու՞ Բաքուն պիտի միջնորդ եւ Պուտին-Դուրով հանդիպման կազմակերպիչ լիներ, կարելի է ենթադրել, որ Telegram-ի միջոցով ադրբեջանական հատուկ ծառայությունները Ֆրանսիային վերաբերող կոնֆիդենցիալ տեղեկություններ են ստացել:

Ադրբեջանը տարեսկզբին հայտարարել է Ֆրանսիայի արտաքին հետախուզական ծառայության «գործակալական ցանցի բացահայտման» մասին, լրտեսության մեղադրանքով Ֆրանսիայի քաղաքացի է ձերբակալվել: Դուրովի նկատմամբ Ֆրանսիայում հարուցված քրեական գործի վարույթը կարող է շատ գաղտնիքներ բացահայտել: Բաքվի իշխանական մամուլը ջղաձգված է:

Բաքուն Ֆրանսիայի դեմ քայլեր է ձեռնարկել Նոր Կալեդոնիայում, կապեր հաստատել Կորսիկայում գործող անջատողականների հետ: Նման խարդավանքներ կազմակերպելու համար Ադրբեջանի հատուկ ծառայությունների հնարավորությունները բավարար չեն: Բացառված չէ, որ ամեն ինչ կազմակերպվել է Ռուսաստանի արտաքին հետախուզության ծառայության կուրացիայով եւ օգտագործվել է նաեւ Telegram-ը՝ միջազգային հանցավոր խմբավորումների հետ կապերով հանդերձ: