Հանրային ՀԸ եթերում ՀՀ ԱԺ նախագահի տեղակալ Ռուբեն Ռուբինյանն անդրադարձավ «Քաղաքացիական պայմանագիր» խմբակցությունից հեռացված պատգամավորներ Հովիկ Աղազարյանի և Հակոբ Ասլանյանի գործողություններին:
«Օրինակ վարչապետը բանակցություններից եկել, խմբակցությանը մանրամասներ է պատմել և ուղիղ ասել, որ դրանք հրապարակման ենթակա չեն, իսկ Աղազարյանը դրա հետ կապված նույնպես արտահոսք է կազմակերպել: Ընդ որում, երբ դա հայտնի է դարձել, նա չի հերքել: Ինձ և «Քաղաքացիական պայմանագրի» համար դա աններելի, մեծագույն մեղք է, և դրա համար մենք պարոն Աղազարյանին դուրս ենք շպրտել ՔՊ խմբակցությունից և կուսակցությունից»,- ասաց Ռուբինյանը:
Ըստ Ռուբինյանի, եթե Ասլանյանը հայտարարում է, որ Աղազարյանի գործողություններում խնդիր չի տեսնում, կարելի է եզրակացնել, որ նա խնդիր չի տեսնում ինչ-որ թերթի ինֆորմատոր լինելու մեջ, կամ պետական գաղտնիք պարունակող տեղեկությունը ինչ-որ թերթի կամ թերթոնի տալու մեջ:
«Պարոն Ասլանյանը հետո ասաց, որ զղջում է, բայց դա անլուրջ է և կարևոր է, որ մարդ պատասխանատու լինի իր արարքի համար: Դրա համար մենք պարոն Ասլանյանին հեռացրել ենք խմբակցությունից և առաջարկում ու պնդում ենք, որ մանդատը դնի, ինչը անում ենք նաև Աղազարյանի դեպքում»,- ասաց Ռուբինյանը:
Ինչպես ավելի վաղ հայտնել էինք, ՀՀ ԱԺ «Քաղաքացիական պայմանագիր» խմբակցության պատգամավոր Հակոբ Ասլանյանը հայտարարել էր, որ որոշում է կայացրել մեկ ամսով կասեցնել ՔՊ-ում իր գործունեությունը։
Նա դիմել էր խմբակցության պատգամավոր Հայկ Կոնջորյանին, որպեսզի խմբակցության անդամներից ձևավորի պատգամավորական խումբ, որի առջև Հովիկ Աղազարյանը կտար պարզաբանումներ:
Ժամեր անց հայտնի դարձավ, որ Ասլանյանը հեռացվել է խմբակցությունից:
Ավելի ուշ Ասլանյանը սոցցանցի իր էջում մի քանի սքրինշոթ էր հրապարակել, որով հայտնել էր, թե իր հայտարարությունը հիմնված է եղել սխալ տեղեկությունների վրա և շարունակում է մնալ «Քաղաքացիական պայմանագիր» կուսակցության և խմբակցության անդամ:
Ինչպես հայտնի է, «Քաղաքացիական պայմանագիր» կուսակցության Վարչության որոշմամբ՝ Հովիկ Աղազարյանը ևս հեռացվել է կուսակցության շարքերից:
Կուսակցությունը որպես հիմնավորում նշել է, որ նա թույլ է տվել պետական և կուսակցական նշանակության կոնֆիդենցիալ տեղեկատվության արտահոսքեր, ինչպես նաև՝ հանրության բարոյական նորմերի կոպիտ խախտումներ։
Ազգային ժողովի նիստի ժամանակ Աղազարյանը հայտարարել էր, որ դուրս է գալիս կուսակցությունից՝ ներողություն խնդրելով կուսակիցներից:
Բաց մի թողեք
Իմ կենսագրությունը, Ծառուկյան ազգանունը և կառուցելը նույնականացել են. ոչ մի բանի համար չեմ ափսոսում
Նիկոլ Փաշինյանի արձակուրդային ուշագրավ ընտրությունը
Երբ հայ նախարարը գրում է. «Այլևս հնարավորություն ունենք», նույնն է, թե Դոստոևսկին գրեր. «Я русскую школу скончался»