«Մենք ի սկզբանե իմացել ենք և հիմա էլ գիտենք, որ հանրային կառավարման կամ ծառայությունների մատուցման ոլորտում ունենք էական խնդիրներ: Խոսքը կառավարության և տեղական ինքնակառավարման մարմինների, պետական այլ մարմինների կողմից մատուցվող ծառայությունների մասին է: Եվ ի սկզբանե մեր պատկերացումներն եղել են այն, որ թվայնացումն է այն հիմնական գործիքը, որով մենք պետք է այդ ոլորտում մեր ունեցած խնդիրները հաղթահարենք»,- Հայաստանում թվայնացման ուղղությամբ աշխատանքների վերաբերյալ հաշվետու խորհրդակցության ընթացքում հայտարարել է վարչապետ Նիկոլ Փաշինյանը:
Նա շոշափում է կարևորագույն խնդիր, սակայն ոչ էական շեշտադրումով: Կարևորագույն խնդիրն այն է, որ Հայաստանում արձանագրվում է պետական և համայնքային ծառայությունների՝ քաղաքացիներին մատուցման որակի շոշափելի անկում: Իսկ այդ ծառայությունը, դրա որակը հիմնարար նշանակության հարց է, որովհետև ունի պետության հանդեպ քաղաքացու վերաբերմունքի, մտածողության ձևավորման հիմնաքարային ազդեցություն:
Եթե օգտագործենք հենց Նիկոլ Փաշինյանի «տրենդային» բառապաշարն ու թեման, ապա, այսօր պետական ծառայությունների մատուցման որակը ըստ էության «ապապետություն» է: Ընդ որում՝ այդ որակը բարձր չի եղել նախկինում, բայց առավել ևս նկատելիորեն նվազել է վերջին տարիներին:
Նիկոլ Փաշինյանը շեշտը դնում է թվայնացման վրա: Թվայնացումն իսկապես գործիք է, պետական ծառայությունների մատուցման որակական վերափոխման գործիք, բայց ընդամենը դրանցից մեկը: Ընդ որում՝ ոչ առաջնայինը: Թվայնացման ազդեցության ընկալումը շատ հաճախ մեխանիկական է, տեսական, պրակտիկ իրողություններից կտրված:
Ավելին, անգամ թվայնացման պարագայում Հայաստանում առկա է պետական ծառայության որակի խնդիր, այս պարագայում տեխնիկական որակի խնդիր, հաճախակի խափանումներ և այլն: Այլ կերպ ասած, պետական և համայնքային ծառայությունների որակի խնդիրը պահանջում է նախ ռեֆորմացիայի համակարգային տեսլական, որից հետո միայն կիրառվող տեխնիկական ու տեխնոլոգիական լուծումները կարող են դառնալ արդյունավետ, դյուրացնելով քաղաքացիների անելիքը:
Այստեղ կա երկու էական ասպեկտ: Նախ՝ քաղաքացին, հարկատուն վճարում է ծառայության համար և այդ հարկատուի միջոցները, դրանց ծախսը կառավարող քաղաքական որևէ ուժ պարտավոր է ապահովել այդ ծախսի էֆեկտիվություն և ծառայության մատուցման որակ: Որևէ արդիական պետությունում այդ ասպեկտը՝ քաղաքական և տնտեսական, նաև անվտանգային օրակարգերին գրեթե հավասարազոր ազդեցություն է թողնում օրինակ ընտրական վարքագծի վրա:
Եվ մյուսը, ինչպես նշեցի վերևում, պետության և համայնքի մատուցած ծառայության համապարփակ որակը ձևավորում է քաղաքացու անմիջական վերաբերմունք այն պետության և համայնքի հանդեպ, որում ապրում է:
Օրինակ, հարկատուին պետք չէ շոյել նրան հերոս կարգելով և հարսանիքներին նրա կենացի գաղափար առաջ քաշելով: Հարկատուին պետք է շոյել նրա վճարած հարկերի միջոցով նրան իսկ պետական որակյալ համապարփակ ծառայություն վերադարձնելով: Դրանք վարչական հարցեր չեն, դրանք են խորքային, անկյունաքարային պետական հարցերը:
Բաց մի թողեք
Ալբանիայում շարունակվում են Թրամփի ընտանիքի հետ կապված հանգստավայրի դեմ բողոքի ցույցերը
Մագյարը պնդում է, որ Ուկրաինայի հետ կնքված փոքրամասնությունների իրավունքների վերաբերյալ համաձայնագիրը կվերացնի ԵՄ անդամակցության վետոն
Վճարել խաղի համար Բրյուսելում. Ինչպես լրատվամիջոցների միջոցառումները դարձան լոբբիստական նոր սահման