Ապօրինի ծագում ունեցող գույքի բռնագանձման գործով ևս մեկ վճիռ է հրապարակվել։ Հակակոռուպցիոն դատարանի դատավոր Կարապետ Բադալյանի վճռով՝ նախատեսվում է Դավթաշեն համայնքի նախկին ղեկավար, 2012-2019 թթ. ԱԺ նախկին պատգամավոր, նախկին ոստիկանապետ Վովա Գասպարյանի փեսա, ՀՀԿ-ական Արթուր Գևորգյանից և նրան փոխկապակցված անձից՝ Վովա Գասպարյանի դստերից՝ Աննա Վլադիմիրի Գասպարյանից, որպես ապօրինի ծագում ունեցող գույք հօգուտ Հայաստանի բռնագանձել շուրջ 668 մլն 200 հազար դրամ:
Հակակոռուպցիոն դատարանը՝ նախագահությամբ դատավոր Կարապետ Բադալյանի, ապօրինի ծագում ունեցող գույքի բռնագանձման պահանջի գործով վճռել է.
Արթուր Սամվելի Գևորգյանից հօգուտ Հայաստանի բռնագանձել 654.894.872 դրամ, միաժամանակ Արթուր Սամվելի Գևորգյանից և Աննա Վլադիմիրի Գասպարյանից, համապարտության կարգով, հօգուտ Հայաստանի բռնագանձել 13.300.000 դրամ։
Վճիռը Վերաքննիչ հակակոռուպցիոն դատարան չբողոքարկելու դեպքում օրինական ուժի մեջ է մտնում հրապարակման պահից մեկամսյա ժամկետում:
Գևորգյանը, հիշեցնենք, գտնվում է հետախուզման մեջ։ Նա անցնում է նաև քրեական գործով։ 2024 թվականի դեկտեմբերի 2-ին դատարանը բավարարել էր դատախազի՝ հեռակա դատաքննություն իրականացնելու միջնորդությունը։
Հիշեցնենք, որ դատախազի՝ 2023 թվականի փետրվարի 24-ի որոշմամբ՝ նախկին պատգամավոր Արթուր Գևորգյանի նկատմամբ հարուցվել էր հանրային քրեական հետապնդում՝ 18.04.2003 թվականին ընդունված Քրեական օրենսգրքի 310.1-րդ հոդվածով (ապօրինի հարստանալը), 314.3-րդ հոդվածի 2-րդ մասով (հայտարարագրերում կեղծ տվյալ ներկայացնելը կամ հայտարարագրման ենթակա տվյալը թաքցնելը) (երեք դրվագ), 190-րդ հոդվածի 3-րդ մասի 1-ին կետով (հանցավոր ճանապարհով ստացված առանձնապես խոշոր չափերով գույքն օրինականացնելը (փողերի լվացումը)):
Տեղեկացնենք, որ սա ապօրինի ծագում ունեցող գույքի բռնագանձման գործերով 5-րդ վճիռն է։
Դրանցից առաջինը վերաբերում է Գագիկ Ծառուկյանի փեսային և դստերը, երկրորդը՝ Սերժ Սարգսյանի եղբորը՝ Լյովա Սարգսյանին փոխկապակցված անձ Գևորգ Վարդանյանին։ Երրորդը վերաբերում է Սուրեն Գաբրիելյանին։
Առաջին վճռով հօգուտ Հայաստանի Հանրապետության կբռնագանձվի 260 մլն դրամ։
Երկրորդ դեպքով դատարանը վճռել է Գևորգ Վարդանյանից հօգուտ ՀՀ-ի բռնագանձել մոտ 163 մլն 850 հազար դրամի անշարժ գույք, 28 մլն 109 հազար դրամ գումար և երկու ՍՊ ընկերություններում մասնակցություն։
Երրորդ վճռով պատասխանողից կբռնագանձվի շուրջ 350 մլն դրամի գույք։
Հակակոռուպցիոն դատարանի՝ 2024 թվականի նոյեմբերի 19-ի վճռով էլ Երևանի քաղաքապետարանի աշխատակազմի ֆինանսական վարչության եկամուտների և ծախսերի ծրագրավորման և մոնիտորինգի բաժնի նախկին գլխավոր մասնագետ Նաիրա Տեր-Ստեփանյանից հօգուտ Հայաստանի Հանրապետության կբռնագանձվի ավելի քան 79 մլն դրամ։
Բացի դրանից՝ ապօրինի ծագում ունեցող գույքի բռնագանձման հայցերով կայացել են նաև հաշտություններ. դրանք 6-ն են։ Դրանց հիման վրա Հայաստանի Հանրապետությանն են փոխանցվել ընդհանուր 7 անշարժ և 1 շարժական գույք, ինչպես նաև շուրջ 687 մլն դրամ:
Նշենք, որ հուլիսի 29-ի դրությամբ դատարան է ներկայացվել ապօրինի գույքի բռնագանձման պահանջով 106 հայցադիմում։ Այս հայցադիմումներով Գլխավոր դատախազության ապօրինի ծագում ունեցող գույքի բռնագանձման գործերով վարչությունը հօգուտ ՀՀ-ի պահանջում է բռնագանձել 1150 անշարժ և 225 շարժական գույք, 300 իրավաբանական անձում մասնակցություն։ Բոլոր հայցադիմումների հանրագումարային արժեքը 559 մլրդ 687 մլն դրամ է։ Այս գումարում ներառված չէ իրավաբանական անձանցում մասնակցության, նաև մի շարք գույքերի արժեքները։
Բաց մի թողեք
Թալանել են Ստեփանավանում հայտնի մի հյուրանոցային համալիր
Աբովյանի Զինկոմիսարիատի մոտ մի խումբ կանանց միջև ծեծկռտուք է եղել, օգտագործվել են նաև քարեր
Կրակոց՝ Կոտայքի մարզում․ եղբայրը կրակել ու վիրավորել է եղբորը