ԱՄՆ-ը Վրաստանին սպառնացել է մեկուսացմամբ

ԱՄՆ Պետդեպարտամենտի խոսնակ Մեթյու Միլլերը Վրաստանի նախկին վարչապետ և «Հանուն Վրաստանի» կուսակցության առաջնորդ Գիորգի Գախարիայի վրա կատարված վերջին հարձակման պատճառով սպառնացել է Վրաստանին մեկուսացմամբ։

Սա հետևում է Միլերի՝ «X» սոցիալական ցանցի իր էջում արված հայտարարությունից:

«Մենք խստորեն դատապարտում ենք Վրաստանի խաղաղ քաղաքացիների, ցուցարարների, լրագրողների և ընդդիմադիր գործիչների, այդ թվում՝ Վրաստանի նախկին վարչապետ Գախարիայի նկատմամբ բռնությունները։ Սա «Վրացական երազանք»-ի ռեպրեսիվ մարտավարության հերթական օրինակն է, որը կբերի երկրի մեկուսացմանը»,- գրել է նա։

Հունվարի 15-ին Բաթումիում անհայտ անձինք ծեծի էին ենթարկել Վրաստանի նախկին վարչապետին։ Միջադեպը, ըստ «Հանուն Վրաստանի» կուսակցության անդամների, տեղի է ունեցել «Շերատոն» հյուրանոցում։ Վիճաբանության արդյունքում Գաարիան քթի կոտրվածք է ստացել, սակայն վիրահատություն չի պահանջվել, և Գախարիան իր կամքով լքել է կլինիկան։