Հեռախոսազրույց է տեղի ունեցել ՌԴ և Թուրքիայի արտաքին գործերի նախարարների միջև: Ինչպես հնարավոր է եզրակացնել ՌԴ ԱԳՆ հաղորդագրությունից, նախաձեռնությունը եղել է Մոսկվային:
Համենայն դեպս, հակառակ կողմից նախաձեռնությամբ զանգերի դեպքում ռուսական կողմը մշտապես նշում է, որ զանգի նախաձեռնությունը դիմացի կողմինն է: Այս դեպքում չկա այդպիսի ընդգծում:
Իսկ այն, թե ում նախաձեռնությամբ է տեղի ունենում շփումը, անշուշտ, ոչ ամենակարևոր, սակայն էական դետալ է: Կարևորը, իհարկե, միշտ էլ բովանդակությունն է և այդ առնչությամբ հաղորդագրությունը շեշտադրում է Սիրիայի իրավիճակը:
Համենայն դեպս, այլ թեմաների վերաբերյալ ընդամենը կա շատ կարճ ձևակերպում, որ պայմանավորվել են շփման մեջ լինել թե՛ սիրիական, թե՛ միջազգային ու ռեգիոնալ օրակարգի այլ հարցերով: Լավրով-Ֆիդան հեռախոսազրույցը տեղի է ունենում Ռուսաստանի և Իրանի միջև ռազմավարական պայմանագրի ստորագրումից հետո, որին նաև նախորդել է Հայաստանի ԱԳ նախարարի հետ Լավրովի հանդիպումը Մոսկվայում, և մի քանի էական հայտարարություն, որոնք ուրվագծում են հայ-ռուսական որոշակի պայմանավորվածություններ:
Ինչպիսի՞ն է դրանց բովանդակությունը և այսպես ասած ժամկետայնությունը, բարդ է ասել, սակայն ինքնին հանգամանքը, որ Լավրովը անոնսավորել է Հայաստան այց, իսկ Հայաստանի ԱԳ նախարարը Մոսկվայում ասուլիսի ընթացքում շեշտել է ռուս-իրանական սերտ գործակցության կարևորությունը, նշանային է:
Մասնավորապես, ուշադրության արժանի է այն, որ բարձրաձայնվել է Սյունիքում ՌԴ հյուպատոսության բացման հարցը, թեև չի մանրամասնվել, թե ինչ է եղել քննարկման արդյունքը: ՌԴ ԱԳՆ խոսնակ Զախարովան հայտարարել է, որ Լավրովն ու Միրզոյանը Մոսկվայում փակ դռների հետևում ունեցել են ավելի քան երեք ժամ անկեղծ զրույց:
Լավրովը Ֆիդանին ինչ-որ բա՞ն է փոխանցել այդ զրույցի առնչությամբ, թե՞ պարզապես Մոսկվան Իրանի հետ պայմանագրից հետո որոշակի ինքնավստահությամբ է համակվել: Համենայն դեպս հաղորդագրությունը նշում է, որ զրույցի ընթացքում շեշտադրվել է Սիրիայում իրավիճակի կարգավորման հարցում բոլոր քաղաքացիների իրավունքների պաշտպանության անհրաժեշտությունը:
Ըստ ամենայնի՝ բոլոր քաղաքացիների ձեւակերպման ներքո Մոսկվան նկատի ունի իր շահերը: Օրերս տեղեկություն տարածվեց, որ Սիրիայում Ռուսաստանի ռազմական ներկայության հարցը քննարկման փուլում է:
Միևնույն ժամանակ, կար եււս մի տեղեկություն, որ Սիրիայի նոր իշխանությունը չեղարկել է Տարտուսի նավահանգստի՝ ռուսական կառավարման պայմանագիրը: Հիշեցնեմ, որ Ռուսաստանի մի ռազմակայանը Տարտուսում է՝ ռազմածովային բազա, որը նաեւ լոգիստիկա է Աֆրիկայի համար: Այստեղ թերևս տեղին է նկատել, որ ռուս-իրանական պայմանագրով, կողմերը իրավունք են ստանում մուտք գործել միմյանց ռազմածովային կայաններ:
Դա նշանակում է, որ Ռուսաստանն Իրանի միջոցով կարող է լոգիստիկ հասանելիություն ստանալ Պարսից ծոցում: Արդյո՞ք դա թույլ է տալիս Մոսկվային Սիրիայի հարցում պայմաններ դնել Անկարայի առաջ:
Բաց մի թողեք
Պուտինն ու Թրամփը պայմանավորվեցին՝ հանդիպել, ինչ սպասել Հայաստանի համար
«Կյամ գանգդ կոտրիմ հատե տըղ» կամ՝ Սամվել Շահրամանյանի ցինիզմի, երախտամոռության «մաստեր կլասսը»
Մեր ադրբեջանցի եղբայրներն ուսումնասիրում են՝ «Զանգեզուրի միջանցքը» կանցնի ՀՀ-ի, թե Իրանի տարածքով. Ուրալօղլու