Մարտի 11-ին կայացել է Ռուսաստանի և Ադրբեջանի նախագահների հեռախոսազրույցը: Այդ մասին հայտնել է Ադրբեջանի նախագահի պաշտոնական կայքը:
Ըստ հաղորդագրության, Պուտինը «երախտագիտություն է հայտնել» Ալիևին Իրանից ՌԴ քաղաքացիների տարհանման և Իրան Ռուսաստանի մարդասիրական օգնության առաքմանը աջակցելու համար:
Ադրբեջանական կողմն այնուհետև ընդգծել է, որ «առաջնորդները մտքեր են փոխանակել Մերձավոր Արևելքի ընթացիկ վիճակի կապակցությամբ և հանդես եկել կրակի շուտափույթ դադարեցման և առկա սուր հակամարտությունը քաղաքական-դիվանագիտական միջոցներով կարգավորելու օգտին»:
Ադրբեջանի նախագահի պաշտոնական կայքի հաղորդագրության տեքստում տեղ է գտել ձեւակերպում, որ, թերեւս, Պուտին-Ալիև հեռախոսազրույցի ամենաէական ընգծումն է. «Ադրբեջանի և Ռուսաստանի նախագահները շոշափել են երկկողմ օրակարգի մի քանի ասպեկտներ:
Վերահաստատվել է ռազմավարական համագործակցության և դաշնակցության սկզբունքներով մի քանի ոլորտներում ռուս-ադրբեջանական փոխգործակցության զարգացման փոխադարձ պատրաստակամությունը»:
Ոչ ավելի, քան երկու շաբաթ առաջ Ադրբեջանի արտաքին գործերի նախարար Բայրամովը հրապարակայնացրել է Ռուսաստանի հետ հարաբերությունների կարգավորման նախապայմանները:
Խոսքն առաջին հերթին նախանցյալ տարեվերջին Գրոզնիի երկնքում ադրբեջանական ուղևորատար ինքնաթիռի կործանման «մեղավորներին բացահայտելու և պատասխանատվության ենթարկելու» մասին է:
Բայրամովն, ընդսմին, առաջին անգամ բաց տեքստով ասել է, որ ինքնաթիռը «խորտակվել է ՌԴ զինվորականների մեղքով կամ նրանց սխալի պատճառով»:
Այս իրավիճակում խոսել Ռուսաստանի և Ադրբեջանի միջև ռազմավարական համագործակցության և դաշնակցության սկզբունքով մի քանի ոլորտներում փոխգործակցության զարգացման երկկողմ պատրաստակամության մասին, միայն մի բան է նշանակում. Վլադիմիր Պուտինը Իլհամ Ալիևին չափազանց կարևոր տեղեկություն է փոխանցել:
Պետք է, թերևս, կարևորել, որ Պուտին-Ալիև հեռախոսազրույցը կայացել է մի իրավիճակում, երբ վարչապետ Նիկոլ Փաշինյանը Փարիզում մասնակցել է միջուկային էներգիայի հարցերով խորհրդաժողովի, որի շրջանակներում արտգործնախարար Արարատ Միրզոյանը հանդիպել է սպառազինությունների և միջազգային անվտանգության հարցերով ԱՄՆ պետքարտուղարի օգնականի հետ:
Նույն օրը «Նեզավիսիմայա գազետան» գրել է, որ Հայաստանում մոդուլային աէկ-ի կառուցման նախագծին Թուրքիան, գուցե, հրապարակային դեմ չարտահայտվի, բայց Ադրբեջանը կարող է «մտահոգված լինել սեյսավտանգ տարածքում ամերիկյան միջուկային տեխնոլոգիաների ներդրման հեռանկարով»:
Ռուսաստանյան պարբերականն, ընդսմին, թույլ է տվել «տեղեկատվական արտահոսք անել», թե «այդ մոդուլային ռեակտորներում օգտագործված ուրանի մնացորդները պահվելու են Հայաստանի տարածքում»: Այդ թեմա՞ն են հատկապես քննարկել Պուտինը և Ալիևը:
Բաց մի թողեք
Լավրովի ախորժակն էլ ուտելիս է բացվում, ձեռնոց է նետում ԱՄՆ-ին
Նեթանյահուին շոկի են ենթարկել Լիբանանին հարվածելու արգելքի մասին Թրամփի խոսքերը. Axios
Ռուսաստանն ու Թուրքիան սահմանել են առաջիկա երկու տարվա առաջնահերթությունները