Ինչ է կատարվում Իրանում, ով է գլխավորը

Իրանի կառավարության հատուկ ներկայացուցիչ Ֆաթիմե Մոհաջերանին բացառիկ հարցազրույց է տվել Irna գործակալությանը, որտեղ կարևորել է իշխանության բոլոր թեևրի համագործակցությունը:

Նա երախտագիտություն է հայտնել եղբայր զինվորականներին, որ իրանական ժողովրդին վերադարձրել են ազգային հպարտության զգացումը։

Խոսքը, անկասկած, Իսրայելին հասցված հրթիռային հարվածների մասին է։ Ի դեպ, ավելի քան մեկ շաբաթ անց իսրայելական կողմը խոստովանել է, որ մի քանի հրթիռ, այնուամենայնիվ, ռազմաօդային ուժերի երկու հենակայան է թիրախավորել։ Կորուստների մասին, սակայն, հստակ տեղեկություններ Իսրայելը չի տարածել։

Իրանի կառավարության հատուկ ներկայացուցչի խոսքում առանձնանում է մի էական հանգամանք։ Նա ասել է, որ Իսրայելին հարվածելու որոշում կայացվել է նախագահ Փեզեշքիանի «իմացությամբ և համաձայնությամբ՝ որպես Անվտանգության բարձրագույն խորհրդի նախագահի, և պաշտպանության նախարարը, լինելով այդ Խորհրդի անդամ, այդ հարցում կարևոր դեր է խաղացել»։

Մոհաջերանին հույս է հայտնել, որ իսրայելական ռեժիմը «զսպվածության բավարար ազդակներ է ստացել և թույլատրելի սահմանները չի անցնի»։ Իրանական վերնախավի անխտիր բոլոր ներկայացուցիչներն իրավիճակի նույն գնահատականն են հնչեցնում։

Արտառոցը, թերևս, կառավարության հատուկ ներկայացուցչի կողմից Իսրայելին հրթիռային հարված հասցնելու հարցում նախագահ Փեզեշքիանի և պաշտպանության նախարարի դերի ընդգծումն է, ինչից տպավորություն է ստեղծվում, թե Իրանում «երկիշխանություն է»՝ մի կողմում ընտրված նախագահն է, որ փաստացի կառավարության ղեկավարի լիազորություն ունի՝ իր թիմով, մյուսում՝ Գերագույն հոգևոր առաջնորդը և Իսլամական հեղափոխության պահապանների կորպուսը։

Ըստ երևույթին՝ առկա են հանրային տրամադրություններ, որ նախագահ Փեզեշքիանը «դիմադրության ճակատի» հարցում «վճռական չէ»։ Մոհաջերանիի խոսքից կարելի է ենթադրել, որ Irna-ին նրա բացառիկ հարցազրույցը կազմակերպվել է, որպեսզի հանրային տարընկալումները հարթվեն, և նախագահ Փեզեշքիանը ներկայացվի որպես պետական կարևորագույն դերակատար։

Փեզեշքիանի ընտրությունից հետո փորձագիտական կարծիք է հնչել, որ եթե նա չհետևի իսլամական հեղափոխության և նրա պաշտպանության ուղեգծին, ապա պահպանողական խորհրդարանը կարող է նրան անվստահություն հայտնել։ Այս ֆոնին tasnimnews-ը հայտնում է, որ Իրանի խորհրդարանում մշակվում է «Դիմադրության պակտ» անվանում ստացած օրինագիծ, որը նախատեսում է ռազմական դաշինք և փոխադարձ օգնության պարտավորություն Իրանի և տարածաշրջանում «անկախության համար պայքարող ուժերի» միջև։

Նման օրինագիծ ընդունելու դեպքում Իրանը կարող է ռազմական դաշինք կնքել «Հեզբոլլայի», «ՀԱՄԱՍ»-ի, ինչպես նաև Եմենի հութիների և Իրաքի «Իսլամական ճակատի» հետ։ Այդ դեպքում Իրանը և Արևմուտքը լարվածությունը թուլացնելու ոչ մի քայլ չեն ձեռնարկի։