ՊՆ նախկին նախարարի որդին զենք է մատակարարում Ռուսաստանին

Իրանցի գործարար Հոսեյն Շամհանին բիզնես ունի, որն ապահովում է Ռուսաստանին իրանական զենքի մատակարարումների մեկ քառորդը, հայտնում է Bloomberg-ը՝ հղում անելով աղբյուրներին։

Հոսեյն Շամհանին Իրանի պաշտպանության նախկին նախարար Ալի Շամհանիի որդին է, ով այժմ ծառայում է որպես երկրի գերագույն առաջնորդ այաթոլլա Ալի Խամենեիի խորհրդական: Գործակալության տվյալներով՝ Շամհանի-կրտսերը մի խումբ գործարարների մաս է կազմում, որոնք զբաղվում են Կասպից ծովով Ռուսաստանին զենք մատակարարելով։ Bloomberg-ը պնդում է, որ նա «առանցքային դեր» է խաղում Մոսկվային իրանական զենքի վաճառքի գործում:

Գործարարին պատկանում է ընկերությունների ցանց, որոնք նավթ և նավթամթերք են արտահանում Իրանից և Ռուսաստանից այն երկրների միջոցով, որոնք չեն միացել պատժամիջոցներին։ Գործակալության տվյալներով՝ Շամհանիի «կայսրությունը» ներառում է նաև հատուկ հիմնադրամ՝ Լոնդոնում, Ժնևում և Սինգապուրում գրասենյակներով, ինչպես նաև տասնյակ նավերից բաղկացած նավատորմ, այդ թվում՝ լցանավեր և բեռնատար նավեր։

Շամհանիի ընկերությունների հետ կապված առնվազն երկու նավ 2023 թվականին Կասպից ծովով զենք, անօդաչու թռչող սարքերի մասեր և երկակի նշանակության ապրանքներ են տեղափոխել Ռուսաստան, հայտնում են Bloomberg-ի աղբյուրները։

Գործակալության զրուցակիցները պնդում են, որ Մոսկվան այդ բեռների համար վճարում է նավթով։ ԱՄՆ ազգային անվտանգության նախկին խորհրդական Ջոն Բոլթոնը կարծում է, որ Շամհանիի ցանցը պայմանագիր ունի անօդաչու սարքերի մատակարարման համար, որոնք Ռուսաստանը օգտագործում է Ուկրաինայում հարձակումների համար։