Մասկը և Ռուբիոն վիճաբանել են, վերջինս քննարկել է Ուկրաինայի հարցը

Ամերիկացի ձեռնարկատեր և Միացյալ Նահանգների Արդյունավետության դեպարտամենտի ղեկավար Իլոն Մասկը մարտի 6-ին կառավարության նիստի ժամանակ վիճաբանել է ԱՄՆ պետական քարտուղար Մարկո Ռուբիոյի հետ, հայտնում է «The New York Times»-ը (NYT)՝ հղում անելով աղբյուրների։

Թերթի աղբյուրների համաձայն՝ Ռուբիոն կատաղել է, որ իրեն ստիպել են «լսել աշխարհի ամենահարուստ մարդու բողոքները»։ Մարտի 7-ի դրությամբ Forbes-ը Մասկի կարողությունը գնահատում է 342,4 միլիարդ դոլար, մինչդեռ Bloomberg-ը գնահատում է այն 330 միլիարդ դոլար Երկու դեպքում էլ դա նրան դարձնում է մոլորակի ամենահարուստ մարդը:

Ռուբիոն, ինչպես հայտնում է NYT-ն, իրականությանը չհամապատասխանող է որակել Մասկի՝ Պետդեպարտամենտի աշխատակիցներին կրճատելու անկարողության մասին խոսքերը։ Նա հայտնել է, որ գերատեսչության 1500-ից ավելի աշխատակիցներ աշխատանքից ազատվել են դրամական փոխհատուցման դիմաց։

Պետքարտուղարն առաջարկել է Մասկին նրանց հետ աշխատանքի ընդունել, իսկ հետո «շոու սարքել՝ աշխատանքից հեռացնելով»։

Ռուբիոն մի քանի շաբաթ մասնավոր դժգոհություն է հայտնել Մասկի մոտեցման առնչությամբ՝ կապված կառավարական ապարատի կրճատման հետ։ Սակայն այժմ պետքարտուղարն իրեն թույլ է տվել իր կարծիքն արտահայտել հանդիպմանը, որին մասնակցել են մոտ 20 պաշտոնյաներ, նշել է հրատարակությունը։

ԱՄՆ նախագահ Դոնալդ Թրամփը հերքել է, որ կոնֆլիկտ է տեղի ունեցել։

«Ոչ մի բախում չի եղել, ես այնտեղ էի։ <…> Իլոնը հիանալի հարաբերությունների մեջ է Մարկոյի հետ, և նրանք երկուսն էլ հիանալի հարաբերություններ ունեն: «Ոչ մի բախում չի եղել»,- ասել է նա լրագրողներին:

Ուրբաթ օրը՝ մարտի 7-ին, հեռախոսազրույց է տեղի ունեցել ԱՄՆ պետքարտուղար Մարկո Ռուբիոյի և Ֆրանսիայի արտգործնախարար Ժան-Նոել Բարոյի միջև, որի ընթացքում կողմերը քննարկել են ռուս-ուկրաինական պատերազմի ավարտը։

Ռուբիոն ընդգծել է, որ ԱՄՆ նախագահ Դոնալդ Թրամփը վճռական է բանակցությունների միջոցով հասնել արդար և կայուն խաղաղության։ Նա նաեւ նշել է, որ Վաշինգտոնը կշարունակի համագործակցել Ֆրանսիայի հետ՝ այդ նպատակին հասնելու համար, գրել են ԶԼՄ-ները։

Բանակցությունները կայացել են Սաուդյան Արաբիայում կայանալիք հանդիպումից առաջ, որը նախատեսվում է անցկացնել հաջորդ շաբաթ Ջիդդա քաղաքում: Դրան կմասնակցեն Մարկո Ռուբիոն, Թրամփի ազգային անվտանգության հարցերով խորհրդական Մայք Ուոլցը, Մերձավոր Արևելքի հարցերով ԱՄՆ նախագահի հատուկ բանագնաց Սթիվ Վիտկոֆֆը և Ուկրաինայի բարձրաստիճան պաշտոնյաներ։

Ավելի վաղ Ուկրաինայի արտաքին գործերի նախարար Անդրեյ Սիբիգան նույնպես Ռուբիոյի հետ քննարկել է Սաուդյան Արաբիայում կայանալիք հանդիպման նախապատրաստական ​​աշխատանքները։

Կողմերը խոսել են նաև երկու երկրների միջև համագործակցության զարգացման հնարավորությունների մասին։

«Ուկրաինան ցանկանում է, որ պատերազմն ավարտվի, և ԱՄՆ-ի ղեկավարությունն անհրաժեշտ է տևական խաղաղության հասնելու համար»,- նշել է Սիբիգան։